АҞӘА, хәжәкыра 16 – Sputnik, Бадраҟ Аҩӡба. Аԥсны ахада Рауль Ҳаџьымба ихы алаирхәит Ахьӡ-аԥша амемориал аҿы 1992-1993шш. рзтәи Аџьынџьтәылатә еибашьраҿы иҭахаз афырхацәа рбаҟа амҵан ашәҭқәа рышьҭаҵара ацеремониа. Ауснагӡатә рхы аладырхәит аибашьра аветеранцәа, атәыла аиҳабыра, ауаажәларра рхаҭарнакцәа.
"Абарҭ амшқәа рзы шәҩыла иреиӷьӡақәаз ҳаибашьцәа ҭахеит. Урҭ ар рхы ҭызгоз ракәын. Ҳәарада дара рҭахара хьаа дууп. Аха иара убри аан аиааира агаразы даҽа шьаҿак ҟаҵан. Аибашьраҿы ажәыларақәа маҷмызт, аха Марттәи ажәылара иҷыдаӡоу аҭыԥ аанызкыло жәылароуп", — иҳәеит Аԥсны Ахада ихаҭыԥуаҩ Витали Габниа.
Аԥсны аҭоурых аҿы арҭ амшқәа хашҭра рықәымкәа иаанхоит иҳәеит иара.
"Иаанхаз ҳакәзар, иҭахаз ргәалашәара ҳаԥсаны ҳаҟазароуп", ҳәа азгәеиҭеит Габниа.
Марттәи ажәылараан иҭахаз ргәаладыршәарц иахьа арахь иааиз рацәаҩӡан.
1993 шықәса март 15 рзы аԥсуа еибашьцәа Гәымсҭа аӡиас ирны Аҟәа ахақәиҭтәразы идәықәлеит, аха ажәылара еиҵахеит. Ацәыӡ дуқәа рыманы март 17-18 рзы аԥсуа архәҭақәа шьҭахьҟа ихьаҵыр акәхеит.
Марттәи ажәылараан иҭахеит 222-ҩык аԥсуа еибашьцәа. Аҭоурых аҿы ари ажәылара лҵшәадоуп ҳәа ирыԥхьаӡоит, аха аибашьра иалахәыз аветеранцәа рыхәҭак ргәаанагарала, уи иабзоураны Аԥсны Аиааира агаратәы аҭагылазаашьа аԥҵахеит.
