АҞӘА, хәажәкыра 30 – Sputnik, Роберт Џьопуа. Аԥсны Аҳәынҭқарраҿ анхаразы азин ҟазҵо адокумент аиҿкаашьа шьақәнарӷәӷәеит Аминистрцәа Реилазаара. Аԥсны Аҩныҵҟатәи аусқәа рминистр Аслан Кобахьиа иҳәеит адокумент аҭахрақәа зегьы ирықәшәо ишьақәыргылоуп ҳәа. Иара рыҭара хацыркхоит иааиуа амчыбжь инаркны.
"Иуҳәар ауеит иара Аԥсны иатәылауаҩым "ипаспорт" ауп ҳәа. Иааиуа амчыбжь инаркны рыҭара ҳалагоит. Атехникатә ган ала зегьы еиҿкаауп", — иҳәеит Кобахьиа.
Иара убасгьы иазгәеиҭеит мызқәак рыҩныҵҟала рхаҭара шьақәзыргыло аҳәынҭқарратә документқәа знапаҿы изкым ауаа шыҟамло. Џьоукы атәылауаҩшәҟәы роуеит, аҽа џьоукы – анхараз азиншәҟәы.
Кобахьиа иара убасгьы иҳәеит анхараз азиншәҟәы зҭахо еиҳарак Гал араион аҟны инхо ауааԥсыра ракәхоит ҳәа.
Аминистрцәа Реилазаара азиндырратә ҟәша аиҳабы Лаша Цаава иҳәеит Аԥсны адәныҟаполитикатә усбарҭа анапы ишанҵоу урыстәылатәи агани иареи аилацәажәарақәа мҩаԥыргарц, Аԥсныи Урыстәылеи рҳәаа ахысраан анхараз азиншәҟәы азакәаншьаҭа аманы иҟазаарц.
"Адокументқәа еиҳаракгьы иазырхиан ԥымкрыда аҳәа ахысразы, атәыла алалареи алҵреи рзы", — иҳәеит азиндырратә ҟәша аиҳабы.
