АҞӘА, мшаԥымза 19 – Sputnik. Аԥсны аофициалтә делегациа рхы аладырхәуеит Аахыҵ Уаԥстәылатәи Ареспублика Ахада Анатоли Бибилов иинаугурациа. Абри атәы Sputnik акорреспондент изаалыцҳаит Аԥсны Аминистрцәа Реилазаара Аинформациеи аҳәынҭпротоколи Русбарҭа аиҳабы Ельза Ҷанԥҳа.
"Аԥсны Аԥыза-министр Беслан Барцыц зхадараҟны дыҟоу Аԥснытәи аофициалтә делегациа иахьа Цхинвалҟа амҩа иқәлоит. Аделегациа аилазаара иалоуп: Аҭагылазаашьа ҷыдақәа рзы аминистр Лев Кәыҵниа, Аԥсны Ахада Иусбарҭа анапхгаҩы ихаҭыԥуаҩ Дмитри Шамба", — лҳәеит Ҷанԥҳа.
Анатоли Бибилов иинаугурациа мҩаԥысуеит 2017 шықәса, мшаԥымза 21 рзы Цхинвалтәи астадион аҟны. Уаанӡа аинаугурациақәа мҩаԥыргон атәыла аиҳабыра реилатәарҭа Азал ду аҟны, мамзаргьы акиноконцерттә зал "Чермен" аҟны.
Аԥснытәи аделегациа адагьы ацеремониа рҽаладырхәраны иҟоуп Урыстәыла, Донецктәи жәлар рреспублика, Лугансктәи жәлар рреспублика, Приднестровие, Ашьха Ҟарабах рҟынтәи асасцәа.
