– Цәаныррақәас ишәызцәырҵуеит ахәыҷқәа анықәгыло?
— Ажиури рыкреслаҟны сантәо еснагь сгәы иҭыхоит дара иқәгыло рхаҭақәа рцәаныррақәа зеиԥшроу аилкаара. Фырхаҵаразар ҟалап абасеиԥш иҟоу асценахь ацәырҵра, ажиури реиԥш ахәаԥшцәагьы "иҟаиҵарызеишь" ҳәа ианузыԥшу. Аферымқәа ҳәа рзысҳәоит зегьы.
- Продиусерк иаҳасаб ала артист иашаҵәҟьа иҟазшьақәак шәҳазрылацәажәандаз. Аԥышәа змоу апродиусер илаԥш иҵашәозеи зегь раԥхьа?
— Ауаҩы уидихалозароуп, улаԥш узиҟәымго ихы мҩаԥигозароуп. Џьоукы уи – хоризма ҳәа азырҳәоит. Авокал мацара сара хаҭала исызхаӡом. Ашәа бзианы изҳәо маҷӡам, аха урҭ зегьы ирылшаӡом угәаҵа архыҭхыҭра, угәаҟынтәи аҭак ацәыргара. Уи Анцәа иулеиҵозароуп. "Аеҵәақәа" ззуҳәашагьы убри азоуп изырацәам.
- "Ты супер!" аконкурсантцәа асеиԥш иҟоу аҟазшьақәа рыдыжәбалоума?
— Иҟоуп. Иҟоуп издызбало. Иаҳҳәап Аԥснытәи аӡӷаб хәыҷ – Валериа Адлеиаԥҳа. Иҟоуп ажиури сшалахәу схашҭны, агәахәара ду сыманы сыззыӡырыҩуа. Уи еиҳау иарбану?
- Ахәыҷқәа "дядя Витя" ҳәа ишәышьҭоуп. Уаҳа ус шәазҳәода?
— Апроект "Ты супер!" ашьҭахь зегь ус сарҳәо иалагар ҳәа сшәоит. Стас Пиехеи Елкеи рыгәҭа сара ҳәарада "дядя Витя" соуп. Ахәыҷқәа шсышьҭо усс исымаӡам, ихадо уи бзиабарала иахьырҳәо ауп.
- Апроект "Ты супер!" алахәылацәа ирашәҳәарц ишәылшозеи?
— Апроект иалахәу зегьы ирасҳәо акоуп: шәылшарақәа аазырԥшуа ашәа алышәхлароуп. Иҟан ашәа ииашаны иахьалхымыз азы иахьынӡахәҭаз зхы ззаамырԥшыз. Ашәа рыдыргалазаргьы, уи уара ишутәым удыруазароуп. Хьаҳәхьачарада мап ацәктәуп. Уажәгьы ушьҭангьы. Афинал аҟынӡа инеиз ашәаҳәаҩцәа уажәшьҭа еилыркаауа иалагеит дара рҟынтәи ҳара ҳаззыԥшу закәу.
