Аинформациатә қәԥара "аштаб"

© Foto / из архива Екатерины БебияМшаԥымза 30 Аԥсуа радио 85 шықәса ахыҵуеит
Мшаԥымза 30 Аԥсуа радио 85 шықәса ахыҵуеит - Sputnik Аҧсны
Анапаҵаҩра
Аԥсуа радио аусура раԥхьатәи амш ҳәа иԥхьаӡоуп 1932 шықәса, мшаԥымза 30. Аԥсны усҟантәи аҭоурыхтә хҭысқәа зегьы иара иадҳәалоуп, избанзар иара акәхеит аинформациатә ларҵәара зегь раасҭа изылшоны иҟалаз.

Бадраҟ Аҩыӡба, Sputnik

Аҭоурыхтә хҭысқәеи арадиои реимадара еиҳагьы иӷәӷәахеит 1970-1989 шықәсқәа раан, аԥсуа жәлар рхақәиҭреи рхьыԥшымреи рзы ақәԥара еиҳа амчра аманы ианыҟала.

Усҟантәи аамҭақәа рзы ателехәаԥшреи арадиои рредактор хадас иҟаз Владимир Занҭариа иажәақәа рыла аԥсуа жәлар рмилаҭ-хақәиҭратә қәԥараҿ арадио инанагӡоз ароль ахәшьара уадаҩуп.

"1989 шықәса рзы Аԥсны Қарҭтәи ауниверситет аҟәша аартхарц азы иҟаҵаз аӡбра ашьҭахь ашьа каҭәеит. Сара схаҭа усҟан ателехәаԥшра адиректорс сыҟан. Арҭ амшқәа раан аӡәгьы аҩныҟа ҳамцазар ҟалап. Ҳусура ҭыԥқәа рҟны ҳаҟан. Штабк еиԥш ҳусура еиҿкаан. Ауаа анҭаха ашьҭахь арахь ажурналистцәа аара иалагеит", — иҳәоит Занҭариа.

Аҟәа, Алашарбага аҳаблаҿ иҟаз аҳәаахьчаратә отриад аҟны аверталиот антәалак ашьҭахь москватәи ажурналистцәа Аԥсуа радиои ателехәаԥшреи "абаҟоу?", ҳәа иҵаауан.

Асахьаҭыхҩы Нугзар Логәуа. - Sputnik Аҧсны
Нугзар Логәуа: ҳмилаҭтә хдырра ашьҭыхраҿы арадио инанагӡо аус акраҵанакуеит

"Ҳара ҳахь дара аҳәаахьшьцәа иааргон. Ҳара ҳзы акраҵанакуаны иҟан Қырҭтәыла иаԥнаҵаз аинформациатә блокада аԥжәара", — иҳәоит Занҭариа.

Иара иажәақәа рыла усҟантәи аамҭазы "Времиа" ажәабжьқәа рпрограмма амаҵзура хада напхгара аиҭон қырҭуак. Иара иакәын аефир ахь инарышьҭуаз аинформациа хылаԥшра азҭозгьы.

"Аԥсны иазкны инарышьҭуаз аинформациақәа, қарҭаа ишырзеиӷьыз ахырхарҭа аиҭон. Убри азы Аԥсныҟа иаауаз акорреспондентцәа аиаша дырҳатәын. Исгәалашәоит Леонид Лазаревич, арадиодырраҭара "Маяк" корреспондентны дшыҟаз", ҳәа игәалаиршәоит Занҭариа.

Ақырҭуа ган ЕгрыГЕС анааныркыла Аԥсныҟа иааиит Урыстәыла Аҩныҵҟатәи аусқәа рминистрра аруаа, астанциа аусура аларгара аиҿкааразы. Урҭ ахҭысқәа акорреспондентцәа иныҭкааны иаадырԥшуан.

"Ҳара урыстәылатәи ҳколлегацәа Аԥсны аҭоурых рзеиҭаҳҳәо ҳаналагалак, оумашәа ирбон, ирдыруаз маҷын. Ирымаз аинформациа ақырҭуа ган иаднацәылон. Астереотипқәа ԥсахтәын. Аҩнынтәи аҭоурых иазкыз ашәҟәқәа рзаазгалон", ҳәа еиҭеиҳәоит Владимир Занҭариа.

Арадиои ателехәаԥшреи рыцхыраарала ажәлар ирыладырҵәон аԥсуаа рыдгьыл аҟны иаԥшәымацәаны аҟазаара азин шрымаз. Занҭариа иажәақәа рыла урыстәылатәи ажурналистцәа еиҳа-еиҳа ргәы иадыркылон аԥсуаа ррыцҳара, еилыркаауан аиаша ахьыҟаз.

Амилаҭ-хақәиҭратә еиҿкаара "Аидгылара анаԥҵаха ашьҭахь, урыстәылатәи акорреспондентцәа аиҿкаара алидерцәа хаҭала ирыҿцәажәон.

"Уажәшьҭа аиаша убар амуа иҟаланы иҟан. Иумҩыр амуагьы иҟан. Убас, агазеҭ "Московские новости" акорреспондент Жаворонков Аԥсны иазкны аинтерес змаз астатиақәа рацәаны икьыԥхьуан", — иҳәоит ажурналист.

Владимир Занҭариа "Аидгылара" аԥҵаҩцәа дыруаӡәкын. Иара убри аамҭазы арадиои ателехәаԥшреи рымаҵ иуан.

Атәыла ахада иабжьагаҩ Владимир Занҭариа - Sputnik Аҧсны
Аԥсуа радио "ахьтәы аамҭа"

"Сара арадиои ателехәаԥшреи "Аидгылареи" еиԥызшьуаз сакәны сыҟан. Џьара акциак мҩаԥыргараны иҟазар, сара аинформациа еснагь исыман. Аредакциатә хеилак ааизганы "абасоуп ишыҟоу" ҳәа рыласҳәон", — иҳәоит иара.

Хәажәкырамза 18 1989 шықәса рзы Лыхнытәи аизараҟны СССР аполитикатә напхгара рахь аҳәамҭа ҟаҵан Аԥсны астатус азырхынҳәызарц азы.

"1989 шықәса ԥхынгәымзазы арадиои ателехәаԥшреи аблокада рыдҟаҵалан уҳәар ауеит. Адәқьанқәа аркын, ачаҵәҟьа узаахәомызт. Ҳафатә аҩнынтә инаагон. Ԥхынгәы 15-16 рзы иҟалаз ахҭысқәа, аԥсыҭбарақәа рышьҭахь ауаа ргәы шьҭыхтәын", — иҳәоит Занҭариа.

"Ҳара усҟан Аԥсны аӡбахә еиҭазҳәаша ауаа ҳрышьҭан. Ақырҭцәа аҳәынҵәа иҳақәырҭәоз аҭак ҟаҵатәын. Мира Константин-иԥҳа Хотелашвили — Инал-ипа слыҳәеит Аԥсны аҭоурых еиҭалҳәарц. Даара аинтерес аҵан имҩаԥылгеит адырраҭара. Нас иҳаҳаит Џьорџь Хиуит дааны дыҟоуп ҳәа. Ҳиҳәеит қырҭшәала дықәгыланы амцра аҿаԥиҽырц. Дақәшаҳаҭхеит. Афактқәа шьаҭас иҟаҵаны ақәгылара бзиа мҩаԥигеит", ҳәа игәалаиршәоит Занҭариа.

СССР аилаҳара ашьҭахь имҩаԥысуаз апроцессқәа Аԥсуа радиогьы анырра арҭон, аусура ианыԥшуан.

Ажәабжьқәа зегьы
0