Sputnik, Рада Ажьиԥҳа
Ақырҭуа ар Аҟәа ианалала, 1992 шықәса нанҳәамза 16 рзы рнапахьы иааргеит арадиотелехәаԥшратә станциа. Аԥсуа телехәаԥшреи арадиои, аредакциақәеи Аҟәантәи Гәдоуҭаҟа ииаган.
"Аԥсуа радио аредакциаҟынтәи сара Гәдоуҭаҟа зиагара сылшаз "репортиорк" ауп – ҳәа лгәалалыршәоит ажурналист Екатерина Бебиаԥҳа. – Нанҳәа 15-16 рзы иҟаҵәҟьаз ҳхаҿы иаҳзаамгацызт. Аҟәа сыҟан. Раԥхьатәи срепортажқәагьы Ацҳа Ҟаԥшь аҟноуп иахьыҟасҵаз. Нас Универсам араион иахьаҵанакуаз ҳаиасит. Исгәалашәоит авертолиот шаҳхагьыжьуаз. Сыла ишабоз сҩызцәа ҭахеит".
Аибашьра раԥхьатәи амшқәа рзы апрограммақәа шьақәыргылан абас: ажәабжьқәа аԥсышәалеи урысшәалеи, атематикатә дырраҭарақәа, аҭыжьымҭа ҷыдақәа.
"Ажәабжьқәа аоперативтә сводкақәа рыла ҳрылагон. Адырраҭарақәа раамҭеи ртематикеи еиҳа-еиҳа ирыцлон, иара убри аан атехникатә хархәагақәа ҳазхомызт. Астудиа анҭыҵ имҩаԥаагоз анҵамҭақәа злаҟаҳҵоз Аҟәа иалызгаз "арепортиор" заҵәык ала акәын", ҳәа лгәалалыршәоит ажурналист.
Лара лажәақәа рыла аибашьра ианалага ашьҭахь шықәсыбжак ааҵуаны ажурналист Семион Адлеиба Ҟарачы-черқьесскнтә иааигеит аҽа "репортиорк".
"Зны-зынла аефир ала ауаа ҳрыҳәон ацхыраара ҳарҭарц. Сара еснагь ҭабуп ҳәа иаҳәара сҭахуп Борис Аџьынџьал. Уи Ростовнтәи иаҳзааишьҭит астериомагнитофонқәа, адиктофонқәа фба. Аудиокассетақәа", — иҳәеит арратә корреспондент.
Аибашьра ианалага раԥхьатәи аамҭақәа рзы аефир ахь ицәырҵуан Тҟәарчалтәи арадиои ателехәаԥшреи. Аха нас, афымцалашара дырцәо ианалага иаргьы аусура ԥхьатәеит. Тҟәарчал араиони "адгьыл ду" ҳәа изышьҭаз Гәдоуҭеи еимаздоз акәны иҟан Аԥсуа радио.
Амацәаз иҭакыз Тҟәарчали Гәдоуҭеи руааԥсыра рыҩнқәа рҟны ирымаз арадиодкылагақәа рыла ажәабжьқәа ирзыӡырыҩуан.
"Арадиодкылагақәа аккумулиаторқәа рхархәарала аус ддыруан, аиашаҵәҟьа иазыӡырыҩуан" ҳәа лгәалалыршәоит Бебиаԥҳа.
Аԥсуа радио адиктор Алла Кәарацхьелиаԥҳа илҳәоит аибашьраан есҽны дшазыгәышьуаз "аиааира аагеит", ҳәа аҳәара.
"Иуадаҩыз аамҭа ҳҭагылан, аха ҳгәы каҳажьуамызт. Аԥсны жәлар аибашьраҟны аиааира ргеит ҳәа радиола ирылазҳәаз Гарри Дбари сареи ҳауп. Сгәазыҳәара наӡеит", — лҳәоит Алла Кәарацхьелиаԥҳа.
"Аԥсны абжьы" адиктор Светлана Қорсаиаԥҳа илҳәоит афронт ахь ицоз ажурналистцәа рзы еснагь ашәара шлымаз.
"Владимир Никоновы сареи адырраҭара "Аԥсны абжьы" мҩаԥаагон. Ашьыжь асааҭ фба инаркны уаха асааҭ акы. Ҩбанӡа аус аауан. Даара иуадаҩын иҭахаз ирызкыз асводкақәа рыԥхьара. Зегь ҳаихӡыӡаауан. Ирацәаҩын ажәыларақәа раан ар ирыцны афронт ахь ицоз ҳҩызцәа", — лҳәоит лара.
Екатерина Бебиаԥҳа еиҭалҳәоит Аԥсуа радио ахьыҟаз ахыбра, Совмин, амца акәҵәиашо ианбылуаз атәы.
"Аҟәа ҳалалеит. Ашҭа ду аҟны абылра иаҿын Совмин ахыбра. Ибылуан Аԥсуа радиогьы. Скабинет аԥенџьырқәа ашҭахь ихан. Сыла ишабоз еилаблит архив", ҳәа лгәалалыршәоит лара.
Ажурналистцәа агәра ргоит аиааира дара рџьабаа ахәҭакгьы шалоу. "Ҳара аефир аҟны аиааира аагеит", рҳәоит дара ргәы аладуны.
