АҞӘА, лаҵарамза 16 – Sputnik, Роберт Џьопуа. Пицунда ақалақь аҿи Пицунда-Мысратәи аҳәырԥссарраҿи адгьылтәии аԥсабарахьчаратәи закәанқәа еилаганы аргыларақәа ахьымҩаԥысуа инадҳәаланы Апрокуратура хадахьы инашьҭуп ашшыԥхьыӡқәа хәба, ҳәа атәыла Ахада адырра ииҭеит Апрокурор хада Зураб Ачба.
"Аԥсабарахьчаратә прокуратурахь инашьҭуп ашшыԥхьыӡ атәылауаҩ Ҳагәыш изакәанымкәа зыргылара даҿу аобиект аганахь ала. Абри ахҭыс инақәыршәаны ихацыркуп аусҭҵаара Аԥсны ашьаустә кодекс ахәҭаҷ 167 инақәыршәаны (хаԥышәарыла адгьыл ахатәтәра). Иаарԥшуп аҳәырԥсарраҟны аҽа еилагаракгьы. Аҳәырԥсарра ахадара ахыбра аҩбатәи аихагыла асасааирҭатә номерқәа алхын. Уи аганахь ала уажәы аусҭҵаарақәа мҩаԥысуеит", — иҳәеит Ачба.
Апрокурор хада иажәақәа рыла Пицунда иахьаҵанакуа закәандарыла ихшьаан 185 шыцҵла. Абри аганахь алагьы аусҭҵаарақәа хацыркхоит.
Зураб Ачба иазгәеиҭоит ахылаԥшратә органқәа русура ԥсыҽуп, асеиԥш иҟоу ахҭысқәа аханатә раанкылара ахәҭоуп ҳәа.
Изакәанымкәа аобиектқәа рыргылара аанкылатәуп ареспублика иахьаҵанакуа зегьы, иҳәеит атәыла Ахада Рауль Ҳаџьымба.
"Иахьаарҭаху аргыларақәа мҩаԥыргоит. Урҭ аргыларақәа рзин ҟазҵо рганахь алагьы ахылаԥшра ӷәӷәа мҩаԥгалатәуп. Ақалақьқәеи араионқәеи рхадацәа абри аус аҿы аҭакԥхықәра рыдзароуп", — иҳәеит Ҳаџьымба.
Мшаԥымза 25 рзы Рауль Ҳаџьымба Пицунда-Мысратәи аҳәырԥсарра аҩныҵҟа изакәанымкәа зыргылара иаҿыз аобиектқәа дырҭааны ибеит, адҵагьы ҟаиҵеит урҭ аргыларақәа аанкылазарц.
