АҞӘА, лаҵарамза 26 – Sputnik, Бадраҟ Аҩӡба. Жәларбжьаратәи амузыкатә шоу "Ты супер!" афинал аламҭалаз Аԥснытәи аҿар Аҟәа, Ахақәиҭра ашҭаҟны Валериа Адлеиԥҳа лыдгыларазы акциа мҩаԥыргеит.
"Ҳара иаҳҭахуп абри акциала Валериа ҳашлыдгыло лнырырц", — лҳәеит Аԥсны аҿартә политиказы аилак аусзуҩы Ҭамила Соломко.
Акциа алахәылацәа рнапқәа рҟны иркын аплакатқәа "Лера – ты супер, мы с тобой!" ҳәа зныз.
"Лера иааҟалҵаз зегьы гәыҭгагоуп, уалаҽхәартә иҟоуп. Ҳәарада, ашоу алахәра аҵакы дуӡӡоуп. Лыхьӡ зегьы ирылаҵәеит. Сгәы иаанагоит аԥеиԥш бзиа лымоуп ҳәа", — лҳәеит Соломко.
Валериа лыдгыларазы Ахақәиҭра ашҭахь инеиит Аҟәа аволантиортә еиҿкаарақәа рлахәылацәа.
"Сара Лера илзеиӷьасшьоит ақәҿиара, ԥхьаҟа ацара", — лҳәеит акциа алахәыла Иланда Гьергьиаԥҳа.
Акциа ахыркәшамҭаз иара иалахәыз зегьы аамҭак ала Валериа лыдгыларазы СМС-қәа еицырышьҭит.
Авокалтә конкурс "Ты супер!" афинал мҩаԥысраны иҟоуп лаҵарамза 26 рзы Кремль.
