АҞӘА, рашәарамза 9 – Sputnik, Бадраҟ Аҩӡба. Аԥснытәи аган Женеватәи аиҿцәажәарақәа раан изныкымкәа аҳәара ҟарҵахьеит қырҭтәылатәи архивқәа рҟны иҵәаху, Аԥсны иазку аматериалқәа рсиа ҳарҭарацы, иҳәеит Аԥсны Аҳәынҭқарратә архивтә усбарҭа аиҳабы ихаҭыԥуаҩ Дмитри Енықь.
"Ҳара Женеватәи аиҿцәажәарақәа раан изныкымкәа аҳәара ҟаҳҵахьеит қырҭтәылатәи архивқәа рҟны иҵәаху, Аԥсны иазку аматериалқәа рсиа ҳарҭарацы. Аха дара еиуеиԥшым амзызқәа цәырганы уи ҭакда иаанрыжьуеит", — иҳәеит иара.
Енықь иажәақәа рыла Аԥснытәи аган иныҭкааны иаздыруам иарбан материалқәоу Қырҭтәылатәи архивқәа рҟны иҵәаху.
Архивтә документқәа Аԥсныҟа рыргьыжьразы Апрограмма аус ауеижьҭеи Қырҭтәылатәи аган иархынҳәхьоу аматериалқәа маҷым, аха урҭ зегьы дара ишырҭаху еиԥш иалкааны ауп ишҳарҭо, иҳәоит Енықь.
"Убас иҳарҭахьеит XIX, XX ашәышықәсақәа ирыҵаркуа адокументқәа. Аҟәа, Гагра, Афон Ҿыц уҳәа рыпланқәа, Чачаа рыжәла иазку аматериалқәа уҳәа иҵегьы", — иҳәоит архивариус.
Хәажәкырамза 15 1929 шықәса рзы Аԥсны ишьаҭаркын архивтә усхк. Жьҭаара 22 1992 шықәса рзы ақырҭуа гвардееццәа ирыблит амилаҭтә архив ахыбра.
