АҞӘА, рашәарамза 22 — Sputnik. Ҩынҩажәижәаба шықәса зхыҵуаз, Гәдоуҭа араион Хыԥсҭа ақыҭа ауаҩԥсы Геннади Сулабериӡе иехсны дыршьит рашәарамза 21 рзы Гагра, Акосмонавтцәа рымҩа аҩны №1 аҿаԥхьа, ҳәа аанацҳауеит ареспублика Апрокуратура хада апресс-маҵзура.
Адыррақәа рыла, макьаназ ишьақәыргылам ахаҿы Сулабериӡе диехсны дишьит. Ахәрақәа зауыз Сулабериӡе аҭыԥ аҟны дыԥсит.
Гагра араион Апрокуратура ашьаусҭҵаара хацнаркит Аԥсны Аҳәынҭқарра ашьаустә Кодекс ахәҭаҷ 217 (изакәанымкәа абџьар амазаара) ахәҭаҷ 99 (ауаҩшьра) инарықәыршәаны.
Ашьра ҟазҵаз ахаҿы иԥшаара иазырхоу ауснагӡатәқәа ирҿуп.
