АҞӘА, рашәара 26 — Sputnik. 20-ҩык инареиҳаны ахәрақәа роуит, 12-ҩык ҭахеит Ирактәи Мосул аҟны еиҿкааз атеракт аан ҳәа аанацҳауеит РИА Новости.
Аԥжәара мҩаԥысит Машахд араион аҟны. Аҽшьҩы Мосул ақалақь ааныжьра згәы иҭаз ахҵәацәа рыгәҭа иҽԥижәеит дара ақалақь изалымҵырц азы.
"Аҽшьҩы ахҵәацәа дрылаӡҩеит, дара ҳаруаа рҟынӡа изымнаӡарц азы урҭ рыгәҭа иҽԥижәеит", — иҳәеит Ирак арратә мчрақәа рхаҭарнак.
Амедикцәа ишырҳәо ала ааха зауз рыгәҭа иҟоуп аҳәсеи ахәыҷқәеи. Ателеканал Press TV адыррақәа рыла Ирактәи арратә мчрақәа иалдыршеит ахҵәацәа ақалақь излалҵыша амҩақәа реиҿкаара.
Мосул ахақәиҭтәраз аоперациақәа мҩаԥыргоит жәларбжьаратәи акоалициа ЕАШ (США) алархәны 2016 шықәса жьҭаарамза аахыс.
Ирак аԥыза-министр Хаидер аль-Абади аҳәамҭа ҟаиҵеит ақалақь амчыбжь аҩныҵҟа ахы ишақәиҭыртәуа азы.
