АҞӘА, рашәара 27 – Sputnik, Бадраҟ Аҩӡба. Медаллеи ибзиаӡоуп ҳәа ашкол иалгази Ражьден Гәымба ихьӡ зху Аԥснытәи аҳәынҭқарратә филармониаҟны аҳаҭыртә шәҟәқәеи аҳамҭақәеи, ашәҭқәеи рырҭеит.
"Ахәыҷқәа ааӡаны амҩа иаша рықәҵара – абри ауп хықәкы хаданы иҳамоу. Ҳара иахьа ҳрыдныҳәалоит ашкол қәҿиарала иалгаз. Ари амш шәара шәзы иухамышҭуа мшуп. Шәышьҭахьҟа инхеит шәхәыҷра, шәаԥхьаҟа амҩа ссир шьҭоуп", — лҳәеит Аҟәа ақалақь Ахадара аҵара Аусбарҭа аиҳабы Лиудмила Адлеиаԥҳа.
Аҟәатәи абжьаратә школ №10 иалгаз ԥшьҩыки ашкол №4 иалгаз аӡәи ахьтәы медалқәа роуит.
Афилармониаҿ имҩаԥысыз аконцерт иалахәын акәашацәеи ашәаҳәацәеи. "Аԥсны анаплакыҩцәа Рассоциациа" қәҿиарала ашкол иалгаз аԥаратә ҳамҭақәа рзыҟарҵеит.
"Сара зегьы сшәыдныҳәалоит. Ишәзеиӷьасшьоит шәҵара иацышәҵарц", — иҳәеит Ассоциациа ахантәаҩы Роман Каҷараа.
Ахьтәы медалқәеи аттестатқәеи аушьҭымҭацәа ирыҭахоит рашәара 28 рзы имҩаԥгахо ахәылԥаз аҟны.
Сынтәа Аԥснытәи ашколқәа ирылгеит ҩ-нызқьҩык инарзынаԥшуа ахәыҷқәа.
