Sputnik, Владимир Бегунов
Островски ифырхацәа рыԥсҭазаара атеатр асцена аҽҭанагӡоит. Араҟа – қәԥароуп, еиҿагылароуп, еибажьароуп. Зегь раасҭа ихадоу ақәыџьмақәа урымфароуп.
"Ибзиан ҳшәыдышәкылар — ҳара ҳзы инасыԥуп. Аҟәатәи ахәаԥшҩы ҳара ҳзы макьана имаӡоу хәаԥшҩуп", — иҳәоит Сергеи Голомазов аспектакль алагамҭаз.
"Ақәыџьмақәеи ауасақәеи" рылоуп иара иҟазарҭа аҭоурых ашьапы шакыз, иара азоуп X афестиваль "Твой шанс" аҟны Гран-при зиоуз.
Аспектакль аҟны иҟам иҵоуроу афырхацәа: зегьы ирыхәаша иашьҭоуп. Афырхацәа ҩ-сқамк рықәтәара рҽазыршәоит. Аӡәы зегьы ианашьахоит, аҽаӡәы – акгьы.
Аԥсуа хәаԥшыҩцәа аԥхьа ҿыцбарах ирбозҭгьы ақәыргыламҭагьы ахәмаршьагьы, аспектакль анынҵәа акраамҭа ахәмарыҩцәа асцена иқәрыжьуамызт.
Атруппа хынтә идырхынҳәит асценахь.
"Актиорцәа рыхәмарра ссир, асценографиа шьахә, арежессура хазына акраамҭа уоурышьҭуам. Насгьы, Островски. Апиеса ииасхьоу ашәышықәса аҭоурых ишалацәажәоугьы иахьагьы актуалра аҵоуп. Заҟа ибзианы иудыруазеи ауасацәа зхарԥоу ақәыџьмақәа", ҳәа Феисбук адаҟьаҟны иҩит Аԥсны Акультура аминистр лхаҭыԥуаҩ Баҭал Кобахьиа.
Ахәаԥшыҩцәа аспектакль ианахәаԥш ашьҭахь зегь раасҭа абасеиԥш ахҳәаа ҟарҵон: "Ирччагоуп, иагьактуалуп".
Аспектакль уаҳа иаҳбом аха атеатр агострольқәа аҽа хымш имҩаԥысуеит. Аҩаша, рашәара 27 рзы РУСДРАМ асценаҿ ицәыргахоит — "Княжна Марья", аԥшьаша, рашәара 29 рзы —"Три сестры". Агострольқәа хыркәшахоит аутистцәа ирызку аспектакль "Особые люди" ала.
