АҞӘА, рашәара 30 – Sputnik, Роберт Џьопуа. VI жәларбжьаратәи арра-дәытә лагер "Аԥсны-ҿа" иалахәхоит 200-ҩык рҟынӡа ҳәа радио Sputnik иазеиҭеиҳәеит Аԥсны аҿартә политиказы Аҳәынҭеилакы ахантәаҩы ихаҭыԥуаҩ Денис Соломко.
"Ҵыԥх ҳлагер рхы аладырхәит Донецктәи жәлар рреспублика, Аахыҵ Уаԥстәыла, Урыстәыла рҟынтәи аҿар. Сынтәа иҳагәҭакуп арҭ аҳәаақәа рырҭбаара. Ҳара ааԥхьарақәа ҳашьҭхьеит. Иазыԥхьагәаҳҭоит 200-ҩык рҟынӡа алагер ралархәра", — ҳәа еиҭеиҳәоит Соломко.
Алагер "Аԥсны-ҿа 2017" ахықәкы аҿар апатриотизм рылааӡареи арратә ҭагылазаашьа разыҟаҵареи роуп. Уи адагьы аҿар арра амаҵ азура иазыхиазароуп.
"Акрааҵуеит алагер аусура Ажара имҩаԥысуеижьҭеи. Уа иҟоуп абаза "Мрамба". Абаза иалнаршоит аҿар аррамаҵзуратә ҭагылазаашьа иахьынӡалшо ала разааигәатәра", — иҳәоит иара.
Денис Соломко иара убасгьы иазгәеиҭоит ишазыԥхьагәаҭо жәларбжьаратәи алагер аԥсҭазаара аҭыхра, иара аҭоурых аиҭаҳәара.
