АҞӘА, ԥхынгәы 3 — Sputnik. Очамчыра араион Аҩныҵҟатәи аусқәа русбарҭа иатәу аамҭала ауаа раанкыларҭаҟынтәи абаандаҩы Багаҭелиа Зураб Нури-иԥа дыбналеит ԥхынгәы 2 рзы (асааҭ 14:30-16:00 ианаҵанакуаз). Абри атәы аҳәоит Апрокуратура хада асаит аҟны.
"Багаҭелиа Зураб Нури-иԥеи Агрба Ибрагим Заур-иԥеи еицәажәаны адәахьы узго аихац ԥҟаны ибналеит. Абри ахҭыс аганахь ала Очамчыра араион апрокуратура ашьаус хацнаркит, Аԥсны Аҳәынҭқарра Ашьаустә Кодекс ахәҭаҷ 315 ахәҭа 2 иаҵаркны", ҳәа аҳәоит асаит адырраҭараҟны.
Иара убасгьы ашьаус хацыркуп Аԥсны Аҳәынҭқарра Ашьаустә Кодекс ахәҭаҷ 295 ахәҭа 1 иаҵаркны Очамчыра араион Аҩныҵҟатәи аусқәа русбарҭа амаҵзурауаа рганахь ала.
