АҞӘА, ԥхынгәы 4 – Sputnik, Роберт Џьопуа. Аԥсны ауааԥсыра рзы Урыстәыла атәылауаҩра аиура иаарласны иӡбахоит, иҳәеит Рауль Ҳаџьымба Владислав Суркови иареи реиԥылара ашьҭахь.
"Адокументқәа хиоуп, Аминистрцәа Реилазаарахь инашьҭуп. Сгәы иаанагоит иаарласны азҵаара аӡбра аиуп ҳәа", — иҳәеит атәыла Ахада.
Сурков инаҵшьны иазгәеиҭеит Урыстәылатәи аган ахь ала ари азҵаара ԥынгыла шамоуа.
"Ҳара ҳганахь ала иарбанызаалак ԥынгыла ҟалом", — иҳәеит иара.
2017 шықәса мшаԥымзазы Урыстәыла Адәныҟаполитикатә усбарҭа ахаҭарнак Мариа Захарова лажәақәа рыла, Урыстәылатәи Афедерациа Аԥсны ахьыԥшымра аназханаҵа ашьҭахь Аԥсны атәылауаа рганахь ала аус руеит егьырҭ атәылақәа ртәылауаа рахь ахархәара змоу аԥҟарақәа, 2008 шықәса рзы Аԥсны атәылауаа иаарласу асхемалоуп атәылауаҩра шроуаз.
Аԥсны атәылауаа Урыстәыла атәылауаҩра роура апроцедурақәа рырмариара урыстәылатәи аган ахыдҵақәа ируакуп, 2014 шықәса рзы Аԥсныи Урыстәылеи рыбжьара анапы зҵаҩу "Аиҩызареи астратегиатә еилахәыреи рзы" Аиқәшаҳаҭра ирықәшәоит.
Урыстәылатәи аган абри аганахь ала аиқәшаҳаҭра апроект азнархиахьеит. Ҳара ҳгәаанагарала иара аусура иалагароуп егьырҭ аиқәшаҳаҭрақәа ирыцны, ҳәа аҳәамҭа ҟалҵеит Захарова.
Рауль Ҳаџьымбеии Владислав Суркови русутә еиԥылараан ирылацәажәеит ҩ-ганлактәи аусеицура амҩаԥысшьеи аԥеиԥшқәеи.
