АҞӘА, ԥхынгәы 5 – Sputnik, Роберт Џьопуа. Аԥсуа самбистцәа аҽазыҟаҵарақәа ирҿуп иаарту атурнир "Амшынқәа ҩба Рыхраҿа" алахәразы. Абри атәы Sputnik аҟны имҩаԥысуаз апресс-конференциаҟны иҳәеит самбо азы азыҟаҵаҩ Роберт Новоиан.
"Ҳара, нанҳәа анҵәамҭазы Кьерч имҩаԥысраны иҟоу иаарту атурнир "Амшынқәа ҩба Рыхраҿа" ҳалахәхараны ҳаҟоуп. Атурнир еиҿнакаауеит урыстәылазегьтәи самбо Афедерациа. Ҳара изныкымкәа ари атурнир ҳалахәхахьеит", — иҳәеит Новоиан.
Иара убасгьы иазгәеиҭеит цәыббра анҵәамҭазы Аԥсны имҩаԥысраны ишыҟоу Аиааира амш иазку итрадициатәу атурнир.
Рашәара анҵәамҭазы ҩыџьа аԥснытәи аспортсменцәа алахәын Асовет Еидгыла Афырхаҵа Нельсон Степаниан иаԥхьахә азы имҩаԥысуаз VIII Жәларбжьаратәи асамбо азы атурнир. Атурнир мҩаԥысуан Арцах.
"Сабри Бигәаа аиааира изымгеит аха иара ианаршьеит "Аиааира аҽазышәараз" адиплом. Артем Бедикиан аҩбатәи аҭыԥ ааникылеит", — иҳәеит азыҟаҵаҩ.
Роберт Новоиан атурнир ишалахәыз 250-ҩык аспортсменцәа Арцах, Ермантәыла, Урыстәыла, Аԥсны рҟынтәи.
Иара убасгьы иазгәеиҭеит самбо Аԥсны еиҳа-еиҳа ирылаҵәо ишалагаз.
