АҞӘА, ԥхынгәы 7 – Sputnik, Роберт Џьопуа. Аԥсны уаанӡатәи Ахада, Аԥсны абаскетбол азы Афедерациа актәи Апрезидент Сергеи Багаԥшь игәалашәара иазку VII Жәларбжьаратәи амҵәышәмпыл азы атурнир мҩаԥысуан Аҟәа, ԥхынгәы 2 — 6 рзы. Атурнир аҟны Ҟарачы-Черқьессктәи акоманда аиааира агеит ҳәа Sputnik акорреспондент изеиҭалҳәеит абаҩырҵәыреи аспорти рзы Аҳәынҭқарратә еилакы аспортҟәша аиҳабы Жанна Занҭариаԥҳа.
"Иааидкылан атурнир иалахәын акомандақәа фба. Черқьессктәи акоманда актәи аҭыԥ ааннакылеит. Аҟәатәи акоманда Волгоградтәи акоманда ианацыхәмар ашьҭахь аҩбатәи аҭыԥ ааннакылеит. Ахԥатәи аҭыԥ ааныркылеит Краснодартәи атәылаҿацә акоманда", — лҳәеит Занҭариаԥҳа.
Иаиааиз акоманда азыҟаҵаҩ Алибек Шебзухов еиҭеиҳәеит акоманда изныкымкәа абри атурнир ишалахәхахьо.
"Ҳара Сергеи Багаԥшь игәалашәара иазку атурнир акырынтә ҳалахәхахьеит. Аиааирақәагьы аагахьеит. Ҭабуп ҳәа расҳәарц сҭахуп иара аиҿкааҩцәа. Уажәазы ҳара актәи аҭыԥ аанаҳкылеит, акыргьы ҳгәырӷьоит", — иҳәеит Шебзухов.
Аԥсны амҵәышәымпыл Афедерациа апрезидент Ҭемыр Бганба иҳәеит есышықәса атурнир агеографиа аҽшарҭбаауа.
Аԥсны уаанӡатәи Ахада, Аԥсны абаскетбол азы Афедерациа актәи Апрезидент Сергеи Багаԥшь игәалашәара иазку VII Жәларбжьаратәи атурнир мҩаԥысуан Аҟәа, ԥхынгәы 2 — 6 рзы.
