АҞӘА, ԥхынгәы 12 — Sputnik, Бадраҟ Аҩӡба. Урыстәылатәи атуристцәа ирықәлеит ԥхынгәы 11 асааҭ 12.20 рзы Гәдоуҭа араион Приморское ақыҭан. Арратә верталиот урыстәылатәи атуристцәа иахьрықәлаз иахаԥыруеит ҳәа ааицҳауеит ҳкорреспондент аҭыԥ аҟынтәи.
Аԥсны Аҩныҵҟатәи аусқәа рминистр Аслан Кобахьиа хаҭала напхгара аиҭоит ацәгьоуцәа раанкылараз имҩаԥырго аоперациа. Ҩ-километрак иахьаҵанакуа аҭыԥ иакәшоуп.
Аҳәынҭқарратә прокуратура адыррақәа рыла Урыстәылатәи атуристцәа ирықәлеит ԥхынгәы 11 асааҭ 12.20 рзы Гәдоуҭа араион Приморское ақыҭан.
Ацәгьоура ҟалеит амшын аԥшаҳәаҿы. Макьаназ зхаҭара шьақәыргылам ҩыџьа ауаа асабардақәа рҿаҵаны, абџьари аҳәызбеи рхархәарала атуристцәа ирықәлеит. Ақәылараан Кабанов Андреи Николаи-иԥа 1984 шықәса рзы ииз игәышԥахьы ҩынтә аҳәызба иларҵеит. Кабанов иоуз ахәрақәа ирыхҟьаны иԥсҭазаара далҵит", — ҳәа аҳәоит асаит адырраҭараҟны.
Ацәгьоуцәа ирӷьычит иара убасгьы Кабанова Наталиеи уи ҩыџьа лхәыҷқәа – 2006 шықәсеи 2015 шықәсеи рзы иизи иара убасгьы Чижикова Наталиеи уи лхәыҷқәа ҩыџьеи, 2002 шықәсеи 2007 шықәсеи рзы иизи. Аоперативтә уснагӡатәқәа ирылыршаны ирӷьычыз ауаа рхы иақәиҭтәын.
Ацәгьоура ҟазҵаз ауаа рыԥшаареи рышьақәыргылареи рзы Гәдоуҭа араион апрокуратура аусурақәа ирҿуп.
