АҞӘА, ԥхынгәы 13 – Sputnik, Бадраҟ Аҩӡба. "Агәыҳалалра ақәҵарҭа" хыртуп Очымчыра ақалақь аҿы ԥхынгәы 12 рзы. Абри атәы лҳәеит агәыҳалалратә еиҿкаара алахәыла Камма Гоԥиаԥҳа.
Лара лажәақәа рыла адәқьан "Магнит" аԥшәмацәа иаразнакы иақәшаҳаҭхеит ирзыҟарҵаз ажәадгала. Адәқьан аҟны ақәҵарҭа аҭыԥ алыркааит ақалақьуаа ирзыманшәаланы иҟалартә еиԥш.
Камма Гоԥиаԥҳа илҳәеит дара ақалақьуаа рганахь ала ахаҵгылара роуп ҳәа дшақәгәыӷуа.
"Ҳусуратә ԥышәа иаҳнарбеит Аҟәеи Тҟәарчали ауаа активра рацәа шаадмырԥшыз", — лҳәоит лара.
Иара убри аан лара илҳәеит агәыӷра шлымоу зылшара ԥку ауаа ацхыраара рыҭара гәыгәҭажьны иаанымхап ҳәа.
"Ҳара хаҭала иааҳҳәоит афатә-ажәтә. Адәқьан адиректор дахылаԥшуеит ақәҵарҭа ҭәу-иҭәыму ҳәа. Ақалақьуаа рацәак ари аус изахамыҵгылт. Ҳара ҳгәыӷуан зегь ҳаицхыраан агәыҳалалра ааҳарԥшып ҳәа", — ҳәа далацәажәоит Камма Гоԥиаԥҳа, Аҟәа ақалақь аҿы иҟоу адәқьан "Сухум-Маркет" аҿы иаарту "Агәыҳалалра ақәҵарҭа" аҭагылазаашьа.
Агәыҳалалратә еиҿкаара "Аԥсны агәыҳалалра ацҳаражәҳәаҩцәа" аԥырҵеит Москва иҟоу аԥсуа диаспора.
"Агәыҳалалра ақәҵарҭақәа" ареспублика ақалақьқәа зегьы рҿы раартра азыԥхьагәаҭоуп.
