АҞӘА, ԥхынгәы 13 – Sputnik. Аԥсны иҟоу Урыстәыла Ацҳаражәҳәарҭа атуристцәа рзы "аҭел ҷыда" (гориачаиа линиа) аанартит. Абри атәы аҳәоит Ацҳаражәҳәарҭа аофициалтә саит аҟны.
Урыстәылатәи атуристцәа дырҳәырц ирықәлеит ԥхынгәы 11 рзы Гәдоуҭа араион Приморское ақыҭан. Абри иахҟьаны урыстәылатәи атурист иԥсҭазаара далҵит.
"Аԥсны иҟоу акриминогентә ҭагылазаашьа инадҳәаланы Аԥсны иҟоу Урыстәыла Ацҳаражәҳәарҭа абжьагара ҟанаҵоит арахь иаауа атуристцәа ргәы рҽанызарц, аҭыԥантәи ауааԥсыреи дареи рыбжьара аимак рҽацәхьаркларц, рхәыҷқәа ирхылаԥшларц, ахатәы маҭәа хылаԥшрада иаанырмыжьларц", — ҳәа аҳәоит адырраҭараҟны.
Ацҳаражәҳәарҭа аҳәара ҟанаҵоит шәарҭарак ҟалар абри аҭел ала адырра ҟарҵаларц: +7 (840) 226-04-91 мамзаргьы аелектронтә ԥошьҭала rusembsukhum@mail.ru адырра ҟарҵаларц.
Ацәгьоура ҟалеит амшын аԥшаҳәаҿы. Макьаназ зхаҭара шьақәыргылам ҩыџьа ауаа асабардақәа рҿаҵаны, абџьари аҳәызбеи рхархәарала атуристцәа ирықәлеит. Ақәылараан Кабанов Андреи Николаи-иԥа 1984 шықәса рзы ииз игәышԥахьы ҩынтә аҳәызба иларҵеит. Кабанов иоуз ахәрақәа ирыхҟьаны иԥсҭазаара далҵит.
Ацәгьоуцәа ирӷьычит иара убасгьы Кабанова Наталиеи уи ҩыџьа лхәыҷқәа – 2006 шықәсеи 2015 шықәсеи рзы иизи, иара убасгьы Чижикова Наталиеи уи лхәыҷқәа ҩыџьеи, 2002 шықәсеи 2007 шықәсеи рзы иизи. Аоперативтә уснагӡатәқәа ирылыршаны ирӷьычыз ауаа рхы иақәиҭтәын.
Гәдоуҭа араион апрокуратура ихацнаркит ашьаусҭҵаара.
