АҞӘА, ԥхынгәы 19 – Sputnik, Роберт Џьопуа. Аҩаша, ԥхынгәы 18 рзы акультуратә ҭыԥ "Склад" аҟны амастер-класс мҩаԥыргеит агәыԥ "Мирайф" асолистка, ашоу "Голос" афиналистка Мариам Мерабовеи акомпозитор, апианист Армен Мерабови.
"Ҳара ҳахьыҟазаалак иахәҭаны иҟазар, аамҭа ҳазхозар амастер-класс мҩаԥаагоит. Ҳдыррақәа гәахәарыла зегьы ирыцеиҩаҳшоит", — лҳәоит Мариам.
Аџьазшәаҳәаҩ Ҭамара Воронова иазылыԥхьаӡоит Мариами Армени Мерабоваа рмастер-класс апрофессионалцәа реиԥш амузыка абзиабаҩцәа зегьы рзы иҵоуроуп ҳәа.
"Ирҿуҵааша рацәоуп. Амастер-классқәа уҽрылауырхәырц азы упрофессионалны уҟазаара аҭахӡам. Ус, ухазы иҿыцу акы удыруеит. Акраамҭагьы ацәанырра гәыбзыӷ уцзаауеит", — лҳәоит Воронова.
Мариами Армени Мерабоваа рмастер-класс ҩ-сааҭк инарзынаԥшуа имҩаԥысуан.
Мариами Армени Аԥсны рыԥсы ршьоит. Мариам Алла Пугачиова авокал азы Лшкол аҟны дырҵаҩын. Уажәы хаҭалатәи аурокқәа мҩаԥылгоит.
