АҞӘА, ԥхынгәы 28– Sputnik, Роберт Џьопуа. Аԥшьаша, ԥхынгәы 27 асааҭ 17.22 рзы Пицунда аҳаирплан маҷ каҳаит. Хҩык ауааԥсыра ҭахеит, аҳаирплан урыстәылатәи авиоклуб иатәуп, ҳәа ҳзааицҳаит Аԥсны Аҭагылазаашьа ҷыдақәа рминистрра апресс-маҵзура аиҳабы Мизан Ломиа.
Ломиа ишиҳәаз ала иҭахаз рхаҭара шьақәыргылоуп.
"Аҳаирплан маҷ урыстәылатәи акоммерциатә авиоклуб "Седьмое небо" иатәуп иҭахеит: апилот, Семенов Александр Витали-иԥа, 1970 шықәса рзы ииз, Самаратәуп; апассаџьырцәа Уколов Андреи Александр-иԥа, 1987 шықәса рзы ииз, Москватәи аобласт датәуп, Дардыкина Екатерина Александр-иԥҳа, 2011 шықәса рзы ииз, Одессатәуп", — ҳәа ҳаиҳәоит Ломиа.
Арыцҳара ахьыҟалаз аҭыԥахь инеихьеит аминистрра аусзуҩцәа. Урҭ уа аусурақәа рымҩаԥгара иаҿуп.
Уаанӡа, ԥхынгәы 7 рзгьы иҟалахьан асеиԥш ахҭыс. Усҟан аҳаирплан маҷ артәараан апилот аԥсҟы измырманшәалеит, аҳаирплан агәы иқәҳәазаны итәеит. Уи иахҟьаны хҩык ауаа, апилоти ҩыџьа апассаџьырцәеи, Гагратәи ацентртә раионтә хәышәтәырҭахь инаргеит. Ааха роуит ҩыџьа Москватәи атуристцәа, ани аԥеи.
Ацхыраара ласы Гагратәи араионтә хәышәтәырҭахь инанагаз актәи ацхыраара рыҭан. Урҭ атуристцәа Шәачаҟа ареанемобиль ала иргеит.
