АҞӘА, нанҳәа 3 — Sputnik, Рада Ажьиԥҳа. Атәылахьчара аминистрра иатәу ашьҭаҵарҭақәа ашәарҭадара анормақәа ирықәшәо иҟан, абри атәы ааицҳауеит Атәылахьчара аминистрра апресс-маӡаныҟәгаҩ Роланд Џьоџьуа.
"Ашәарҭадара анормақәа зегьы азгәаҭан иҟан. Иаалрҟьаны аԥжәара зыхҟьаз ҳәа макьана иҳаздыруам, ашьақәыргылара ҳаҿуп. Атәылахьчара аминистрраҟны еиҿкаауп аусуратә гәыԥ. Агәаҭарақәа анхырқәшахалак анаҩсан еилкаахоит аԥжәара зыхҟьаз", — иҳәеит Џьоџьуа.
Рауль Ҳаџьымба иқәҵарала аџьаԥҳанышьҭаҵарҭа аԥжәара ахҟьа-ԥҟьақәа раԥыхразы Аҳәынҭқарратә комиссиа аԥҵоуп.
Аахақәа зауз рҟынтәи ареспубликатә хәышәтәырҭахь иаагоуп 17-ҩык, 8-ҩык ахәышәтәра иахысуеит, егьырҭ раԥхьатәи ацхыраара анрырҭа ашьҭахь рыҩныҟақәа иоушьҭуп.
Гәдоуҭатәи ахәышәтәырҭахь инагоуп 44-ҩык, Гагратәи ахәышәтәырҭахь 3-ҩык, Афон ҿыцтәи ахәышәтәырҭахь ҩыџьа.
