АҞӘА, нанҳәа 3 — Sputnik. Рауль Ҳаџьымба аџьаԥҳанышьҭаҵарҭа аныԥжәоз иҭахаз урыстәылатәи атуристцәа рҭаацәа дрыдашшылеит. Абри атәы аанацҳауеит атәыла Ахада иофициалтә саит.
"Аԥсны гәалсра дула ирыдыркылеит урыстәылатәи атуристцәа рҭахара. Аԥсны иқәынхо ажәлар шәгәырҩа шәыцеиҩыршоит", ҳәа аҳәоит адашшыларатә шәҟәы аҟны.
Уаанӡа, Аҧсны Аҳәынҭқарра Ахада Рауль Ҳаџьымба Гәдоуҭа араион Приморское ақыҭан иҟоу Аҧсны Атәылахьчара аминистрра иатәу аџьаҧҳанышьҭаҵарҭа аҧжәара азҵаара инамаданы аоперативтә еилатәара мҩаҧигеит.
Аилатәараҟны Ахада Аҧыза-министр Беслан Барцыц дҵаны изықәиргылеит иҷыдоу акомиссиа аҧҵара, ауааҧсыра ироуз аҧхасҭеи урҭ ирыҭатәу акомпенсациеи ршәагаа ашьақәыргыларазы, Урыстәылатәи Афедерациа атәылауаагьы убрахь иналаҵаны. Агәабзиарахьчара аминистр Ҭамаз Ҵахнакьиа дҵас ииҭеит ахҭыс иахҟьаны згәабзиара ааха аиуз ауаа аминистрра ахарџь ала ацхыраара рыҭаразы.
Гәдоуҭа араион ахада Руслан Ладариа идиҵеит Гәдоуҭа араион Приморское ақыҭа иахьаҵанакуа иҟоу Аҧсны Атәылахьчара аминистрра иатәу аџьаҧҳанышьҭаҵарҭа аҧжәара иахҟьаны аҧхасҭа зауз аҩнқәа рҟны зыҧсы зшьоз аҧсшьаҩцәа даҽа ҭыҧк аҟны рнырхара азҵаара аӡбара.
Аилатәара анхыркәшаха ашьҭахь, Аҳәынҭқарра Ахада ааха зауз ауааҧсыра ахьышьҭоу Аҳәынҭқарратә хәышәтәырҭа даҭааит.
Уи аҧхьа Аҳәынҭқарра Ахада ахҭыс ахьыҟалаз аҭыҧ ахь днеит, Атәылахьчара аминистрреи Аҭагылазаашьа ҷыдақәа рзы аминистрреи реиҵаҟәшақәеи Аҩныҵҟатәи аусқәа рминистрреи русушьа хаҭала игәеиҭаразы.
