АҞӘА, нанҳәа 25 – Sputnik. Аԥсны иалҵны Урыстәылаҟа ицоз ареистә автобусқәа ҩба: "NEOPLAN" "Мерседес Бенц" аанкылан уаанӡа иҟаз аоперативтә информациа адыррақәа рыла. Абри атәы анацҳауеит Урыстәылатәи Афедерациа Аладатәи аҳазалхратә усбарҭа апресс-маҵзура.
Актәи автобус аҟны ирбеит зыӡбахә арбамыз 2243 блок аҭҭын, аҩбатәи аҟны – 1400 блок.
Аконтрабандатә аалыҵ зхатәыз руаӡәк аҳазалхыҩцәа ишреиҳәаз ала иара арҭ аҭаҭын блокқәа Аԥсны иҟоу аопттә џьармыкьақәа руак аҟны иааихәеит, нас Урыстәыла аҭиразы. Иара иажәақәа рыла аҭиҩы иарбанызаалак документк иимҭаӡеит, убри азы иӡбеит аидара иҵәахырц.
Атауар зегьы ырбаандаҩуп. Аекспертиза иахрыжьраны иҟоуп ахәԥса ашьақәыргыларазы.
