АҞӘА, нанҳәа 25 – Sputnik, Амра Амҷԥҳа. Фазиль Искандер ихьӡ зху Аурыс драматә театр аҟны иааиԥмырҟьаӡакәа арепетициақәа ирҿуп. Иаздырхиоит Гоголь и-"Ревизор". Абри атәы ҳзеиҭеиҳәеит РУСДРАМ адиректор хада Иракли Хынҭәба.
Аспектакль "Ревизор" ала жьҭаарамзазы иаартхоит РУСДРАМ 37-тәи атеатртә сезон.
"Аспектакль азы иахәҭоу зегьы хаҭабзиара дуӡӡала еиҿкаахоит. Арежиссура аганахь ала акәзар, Андреи Тимошенко ихьӡ зегьы еицырдыруеит, акы ахҳәаара аҭахны иҟаӡам. Уажәы арепетициақәа иааиԥмырҟьаӡакәа ҳарҿуп. Иара убри аамҭазы нанҳәамзазы иқәҳаргыло аспектакльқәагьы ррепетициа ҳаҿуп", — иҳәеит Иракли Хынҭәба.
Хынҭәба еиҭеиҳәеит аспектакль ҿыц азы иҷыдоу ацәамаҭәа аӡахра ишаҿу.
"Ашьапымаҭәа, ацәамаҭәа, апарикқәа. Аххаҵақәа уҳәа зегьы урыстәылатәи атеатр дуқәа аус рыцызуа аҟазарҭақәа рҟны рыӡахра ҳаҿуп", — иҳәеит адиректор хада.
РУСДРАМ актиорцәа ракәзар ԥсшьаха рымамкәа арепетициақәа имҩаԥырго рацәак хьаас иркым, избанзар рус бзиа ирбоит. Уи дара рыԥсҭазаара иахәҭакуп.
Иракли Хынҭәба иара убасгьы иазгәеиеҭит амеценат Николаи Ачба ида русура акыр еихәлахар шалшоз, "Ревизор" еиԥш иҟоу аспектакль ақәыргылара акыр ишыуадаҩхоз.
Макьаназы РУСДРАМ аҟны 36-тәи атеатртә сезон амҩаԥысра иаҿуп. Нанҳәамза иалагӡаны ахәаԥшцәа ирбар рылшоит аспектакльқәа ҩба: нанҳәа 28 рзы – ахәыҷтәы спектакль "Братец Кролик и Братец Лис", нанҳәа 30 рзы– "Примадонны".
"Пять вечеров" аспектакль ала цәыббра 21 рзы ихыркәшахоит Фазиль Искандер ихьӡ зху Аурыс драматә театр 36-тәи асезон.
