Аҟәа, 9 цәыббра — Sputnik, Амра Амҷԥҳа. Ансамбль "Адаул" алахәылацәа Жәларбжьаратәи афестиваль рҽаладырхәуеит Аԥсны ахьӡ ҭыргарц. Абри атәы иҳәеит Sputnik арадиостудиаҟны ансамбль аиҿкааҩ-анапхгаҩы, Аԥсны зҽаԥсазтәыз артист Еснаҭ Сангәлиа.
Апрограмма иаларгалоит адаул атриук ҿыцқәа, есыҽны ҩба-хԥа сааҭ рҽазыҟарҵоит.
"Ибзианы ҳҽазыҟаҳҵароуп. Аиааира ҳзыгар уи Аԥсны иатәхоит. Схазы акәӡам сзаҿу. Ахәыҷқәа рзоуп, Аԥсназы ауп. Ацхыраара ҳарҭар иҭабуп идуӡӡан ҳәа раҳҳәоит", — азгәеиҭеит Еснаҭ Сангәлиа, Санкт-Петербургҟа ацаразы ансамль "Адаул" алахәылацәа афинанстә цхыраара шырҭаху атәы еиҭаҳәо.
Уажәраанӡа адаул асыҩцәа рҭаацәа ракәын ацхыраара ҟазҵоз. Афестиваль аԥҟарақәа рыла алахәхаразгьы аԥаратә лагала шәатәуп.
Март мзазы Санкт-Петербург имҩаԥысуаз Жәларбжьаратәи афестиваль аҿы ансамбль "Адаул" қәҿиарала иқәгылеит.
"Уажәы ԥшь-фестивальк имҩаԥысхьоу рҿы аиааира згақәаз еиқәшәоит асуперфинал аҿы. Жәлар рҟазара аинструменталтә музыка аноминациа иаҵанакуеит адаул асра, — иҳәеит ансамбль анапхгаҩы. — Жәаҩа-ҩык рҟынӡа сызгар бзиоуп. Ахәыҷқәа роуп иқәгылоу, 12 инаркны 17-нӡа зхыҵуа аҷкәынцәа".
Ансамбль "Адаул" аҿы иҟоуп х-гәыԥк, зынӡа 50 аҵаҩцәа рҽазыҟарҵоит Аԥсны зҽаԥсазтәыз артист Еснаҭ Сангәлиа иҿы.
