АҞӘА, цәыббра 13 – Sputnik, Сариа Кәарацхьелиаԥҳа. Рауль Ҳаџьымба инапы аҵеиҩит Аҿартә политиказы Аԥсны аҳәынҭқарратә еилакы ахантәаҩ ҿыц иаҭаразы Аусдҵа. Аҿартә политиказы Аԥсны аҳәынҭқарратә еилакы ахантәаҩс далхуп Ҭеимураз Кәакәасқьыр. Абри атәы аанацҳауеит Аԥсны Ахада ипресс-маҵзура.
"Сара сзы ари ажәабжь ҿыцын. Уажәы аҭҵаара салагоит иарбан хырхарҭоу еиҳа ҳҿар рзы хра зманы иҟоу. Аконцепциа ҿыц аус адааулароуп", — иҳәеит Ҭеимураз Кәакәасқьыр.
Ҭеимураз Кәакәасқьыр 2000 шықәса раахыс акоманда "Нарты из Абхазии" далахәылоуп. 2015 шықәса рзы далгеит Москватәи асценаристцәеи арежиссиорцәеи рзы Иреиҳаӡоу акурсқәа. Идиалогдоу афильм "№ 211" авторс дамоуп.
2017 шықәса рзы Ҭимур Ҭаниа ифильм "Спасибо деду за победу" аҟны иҽҭихуан.
Уаанӡа Аҿар рзы Аҳәынҭқарратә еилакы ахантәаҩыс дыҟан Алиас Аҩӡба.
