АҞӘА, цәыббра 14 – Sputnik, Бадраҟ Аҩӡба. Дырмит Гәлиа ихьӡ зху Аԥсуаҭҵааратә институт аҿы аԥшьаша цәыббра 14 рзы иӡырган Владимир Занҭариа аҵыхәтәантәи ашықәсқәа рзы иҭижьыз ашәҟәқәа.
"Зегь раԥхьа иргыланы ажәеинраалақәа реизга "Бзанҵы" аӡбахә сҳәарц сҭахуп. Ауаҩы маҷк иқәра данынҭыҵлак, аԥсҭазаара акыр даналаԥшлак, философиатә еихшьаалақәак ҟаиҵар иҭаххоит, уи игәҭыхақәа афилософиатә ҟазшьа риҭар иҭаххоит", — иҳәеит Занҭариа.
Уи иҳәеит игәы шышьҭнахуа ари ажәеинраалақәа реизга иқәҿиеит ҳәа ирымоу агәаанагара. Ари ажәеинраалақәа реизга азы Владимир Занҭариа ианашьан Дырмит Гәлиа ихьӡ зху аҳәынҭқарратә премиа.
"Иара убас, "Дисциплина духа", ҳәа иналукааша ашәҟәыҩҩцәа, аҵарауаа, ажәлар русзуаҩцәа убарҭ ирызку аочеркқәа еидызкыло ашәҟәы урысшәала иҭыҵит. Уи анаҩс аурыс-аԥсуа литературатә еимадарақәа рыпроблема цәыргоуп статиа дук аҿы", — иҳәеит Занҭариа.
Иахьа иӡыргаз ашәҟәқәа иреиуоуп Владислав Арӡынба изкны 2015 шықәсазы Владимир Занҭариа иҭижьыз ашәҟәы.
"Ашәҟәы "Слово о первом президенте" иагәылалеит адокументқәа, уи аԥхьажәа ҩны иҭсыжьыз шәҟәуп", — азгәеиҭеит Владимир Занҭариа.
Иара убас, Владимир Занҭариа иӡыригеит ашәҟәы "Ключевые мысли", уи ианылеит аԥсуа шәҟәыҩҩцәа нагақәа рырҿиара аҷыдарақәа ирызку астатиақәа реизга.
