АҞӘА, цәыббра 19 – Sputnik, Амра Амҷԥҳа. Аамҭақәак рышьҭахь ауаа абанкоматқәа рҭаара иаҟәыҵуа иалагоит, избанзар акарточкагьы аԥареиԥш шәагатә хархәагоуп иҳәеит Аԥсны Аҵәахырҭатә банк ахантәаҩы Ҭимур Бганба атәанчахәы аныршо актәи амшқәа рзы абанкоматқәа рҟны аҭыԥ зоуа аҭагылазаашьа ахҳәаа аҭо.
"Акарточкақәа рыла адәқьанқәа рҟны ахәшәара алшоит. Аамҭақәак рышьҭахь ауаа еилыркаауа иалагоит акарточка шус бзиоу", — иҳәеит иара.
Иара убри аамҭазы иазгәеиҭеит атәанчахәқәа аныршо аԥхьатәи амшқәа рзы агәаранқәа аҭыԥ шроуа.
"Ҳаргьы ҳақәшаҳаҭуп атерминалқәа шазымхо. Уи аус адулара ҳаҿуп. Иаарласны иааҳартраны иҟоуп аҿыц шьақәгылақәа. Мышқәак рышьҭахь аџьармыкьа иахьаҵанакуа иҳаргылоит терминалк. Уи азҵаара армариоит", — иҳәеит Бганба.
Акарточкақәа рыҟазаара акыр иармариеит атәанчахәы ашәара. Еиҳа аиҿкаара ҟалеит.
