АҞӘА, цәыббра 27 – Sputnik, Амра Амҷԥҳа. Авизит аамҭа иалагӡаны анапы аҵаҩхоит еиҭарҿыцу Аԥсны Аҳәынҭқарреи Приднестровиатәи Молдавиатәи Ареспубликеи рыбжьара аиҩызареи аусеицуреи рзы Аиқәшаҳаҭра. Абри атәы Sputnik акорреспондент илзеиҭеиҳәеит Аԥсны Аҳәынҭқарраҟны иҟоу Приднестровиатәи Молдавиатәи Ареспублика аофициалтә хаҭарнак Гарри Кәпалба.
"Аиҩызареи аусеицуреи рзы аԥхьатәи аиқәшаҳаҭра анапы аҵаҩын Аԥсны аибашьра анцоз аамҭазы: ажьырныҳәа 22 1993 шықәса рзы. Уиижьҭеи аамҭа акыр цеит, аҽаԥсахит. Аиқәшаҳаҭра рҿыцтәуп, иалагалатәуп ахарҭәаарақәеи аԥсахрақәеи", — иҳәеит Кәпалба.
Аԥсны Аҳәынҭқарраҟны иҟоу Приднестровиатәи Молдавиатәи Ареспублика аофициалтә хаҭарнак Гарри Кәпалба иара убасгьы иазгәеиҭеит аиҩызареи аусеицуреи рзы Аиқәшаҳаҭра адагьы анапы шаҵаҩхо ақалақьқәа Гәдоуҭеи Дубоссары рыбжьара аиашьараз аиқәшаҳаҭра.
"Гәдоуҭа араион аҟны анышә дамадоуп хатәгәаԥхарала Приднестровиантәи иааны еибашьуаз арԥыс. Ақалақьқәа рхадацәа ирыӡбеит шьала еибарку реиҩызара азакәан шьаҭа азҭо аиқәшаҳаҭра рыбжьарҵарц", — иҳәеит иара.
Приднестровиатәи Молдавиатәи Ареспублика аделегациа, Приднестровиатәи Молдавиатәи Ареспублика Ахада Вадим Красносельски зхадараҿы дыҟоу, иалахәуп: Адәныҟатәи аусқәа рминистр Витали Игнатьев, Дубоссартәи араиони ақалақь Дубоссари рхада, Приднестровиатәи Молдавиатәи Ареспублика Ахада актәи ихаҭыԥуаҩ Алексеи Пакулич.