АҞӘА, цәыббра 26 — Sputnik. Приднестровиатәи Молдавиатәи Ареспублика аделегациа, Приднестровиатәи Молдавиатәи Ареспублика Ахада Вадим Красносельски зхадараҿы дыҟоу, рҽаладырхәраны иҟоуп Аиааира Амш иазку аныҳәатә уснагӡатәқәа цәыббра 28 инаркны жьҭаара 1 аҟынӡа. Абри атәы аанацҳаит Аԥсны Ахада иофициалтә саит цәыббра 26 рзы.
"Цәыббра 28 рзы Рауль Ҳаџьымбеи Вадим Красносельскии аиҿцәажәара мҩаԥыргоит. Иазыԥхьагәаҭоуп ҩ-ганктәи аусеицура аԥеиԥш азҵаарақәа рылацәажәара", — ҳәа аҳәоит адырраҭараҟны.
Приднестровиатәи Молдавиатәи Ареспублика аделегациа, Приднестровиатәи Молдавиатәи Ареспублика Ахада Вадим Красносельски зхадараҿы дыҟоу, иалахәуп: Адәныҟатәи аусқәа рминистр Витали Игнатьев, Дубассартәи араиони ақалақь Дубассари рхада, Приднестровиатәи Молдавиатәи Ареспублика Ахада актәи ихаҭыԥуаҩ Алексеи Пакулич.
