АҞӘА, жьҭаара 9, Sputnik — Бадри Есиава. Асоветтә шьапылампыл асҩы Витали Дараселиа дыргәаладыршәон, ашәахьа, жьҭаара 9 рзы Очамчыра, абри атәы Sputnik акорреспондент иаиҳәеит ахәыҷтәы ашьапылампылтә клуб "Динамо" азыҟаҵаҩ Мераб Кәакәасқьыр.
"Иахьа, Очамчыра, Витали Дараселиа ибаҟа амҵан, ишьҭарҵеит ашәҭқәа. Агәалашәаратә усмҩаԥгатә иалахәын араион ахадеи, Жәлар реизара адепутат Инал Ҭарба, ашьапылампыл асҩы иҭаацәа, Очамчыратәи алицеи аҵаҩцәа", — иҳәеит Кәакәасқьыр.
Азыҟаҵаҩ иажәақәа рыла Витали Дараселиеи иареи хаҭала еибадыруамызт, аха иҩызцәа рҟынтә еицырдыруа аԥсуа шьапылампыл асҩы иҭоурых идыруеит.
"Асоветтә аамҭазы Қарҭ ҳалан аҟнытә, ҳәарада ԥсыуа хәмарҩык иаҳасабала қырҭтәылатәи ашьапылампыл асраҿы илагала маҷмызт. Иара дыздыруаз иҩызцәа ражәақәа рыла згәы цқьаз иаартыз уаҩын. Бзиа ибон иқалақь гәакьа, еснагь Очамчыраҟа данаауаз, иаамҭа зегьы ара ихыигар иҭахын", — иҳәеит иара.
Мераб Кәакәасқьыр иазгәаиҭеит, абаҟа ашьақәыргылараҿы Москва иҟоу аԥсуа диаспора ацхыраара ду шыҟарҵаз.
