АҞӘА, жьҭаара 11 – Sputnik. Жьҭаара 10 рзы Каталониа аженералитет ахада Карлес Пучдемон каталониатәи апарламент адепутатцәа рҿаԥхьа дықәгыланы ареферендум аихшьаалақәа рылеиҳәеит. Иара убри аан Пучдемон Каталониа ахьыԥшымра алаҳәара аамҭақәак иаанкыланы Испаниа аиҳабыреи дареи еиҿцәажәарц аҳәара ҟаиҵеит. Абри атәы аанацҳауеит РИА Новости.
"Ажәадгала ҟасҵоит Ахьыԥшымраз Адекларациа амчра аҭара аамҭақәак иаанкыланы аиҿцәажәарахь ҳаиасырц" — иҳәеит иара адепутатцәа рҿаԥхьа дықәгыло. Иара убри аан иациҵеит Каталониа ареспублика аформа змоу ҳәынҭқарран аҟалара азин аиуит жьҭаара 1 азы имҩаԥгаз ареферендум аихшьаалақәа инарықәыршәаны ҳәа.
Жьҭаара 1 азы Каталониа ахьыԥшымразы ареферендум мҩаԥган. Иааидкыланы абжьыҭира рхы аладырхәит 2,3 миллионҩык Каталониа ауааԥсыра.
Алхырҭатә ҭыԥқәак рҟны алхыҩцәеи аполициеи рыбжьара аидысларақәа ҟалеит. Иҟоуп ахәрақәа зауз.
Испаниа акрал Фелипе VI ижәлар рахь иҟаиҵаз аҳәамҭаҿ иазгәеиҭеит Каталониа аиҳабыра ареферендум амҩаԥгарала Испаниа акзаара ҵыршәааит ҳәа.
