АҞӘА, жьҭаара 12– Sputnik, Сариа Кәарацхьелиаԥҳа. Аԥснытәи адизаинер Расида Лакоба аԥхьахә "Ашықәс адизаинер" ланашьаразы дықәгылоуп.
"Ҵыԥх раԥхьаӡа акәны аԥхьахә санашьан. Алхрақәа иарбан ҵаҵӷәыз ирымаз сыздырам, аха сара салкаан", — лҳәоит Расида.
Расида Лакоба –ахәылԥазтә ашәҵатәы Rosario аҟазарҭа директорс дыҟоуп. Абренд иҷыдоу (ахәылԥазтәи, аныҳәатәи) шәҵатәуп иҭнажьуа. Расида Лакоба лажәақәа рыла,дара рахь инеиуа ауаа ныҳәак зҽазыҟазҵо роуп.
"Есышықәса ԥшьба-ԥшьба коллекциа азҳархиоит. Аусутә рацәаны иҳамоуп. Сынтәатәи ашықәс азы голливудтәи артистцәа, Дженнифер Лопес, Кети Перри, Алессандра Амбросио уҳәа ирацәаҩны рышәҵатәы ҳӡахыит", — ҳәа еиҭалҳәоит лара.
Ажурнал Glamour есышықәса имҩаԥнагоит "Ашықәс адизаинер" захьӡу аконкурс. Абжьыҭира хыркәшахоит абҵара 13 рзы.
