АҞӘА, жьҭаара 12– Sputnik, Сариа Кәарацхьелиаԥҳа. Косики карате азы иаарту ачемпионат аҟнытә ҳаспортсменцәа ахьтәы медалқәа фба Аԥсныҟа иааргеит. Косики карате азы иаарту ачемпионат мҩаԥган ақалақь Ростов-на-Дону аҟны, жьҭаара 8 рзы. Абри атәы ҳзеиҭеиҳәеит Косики карате азы Афедерациа ахада Демис Адлеиба.
"Ҳкоманда иалахәын 10-ҩык аспортсменцәа. Дара зегьы қәҿиарала иқәгылеит. Урҭ рҟынтәи фҩык ахьтәы медалқәа ранашьахеит", — иҳәеит иара.
Ачемпионат алахәылацәа рҟынтәи аҽа ҩыџьа аразнытә медалқәа ранашьахеит, аӡәы – аџьазтә медал.
"Ҳара уахь ҳцара еиҿкаахеит аҭаацәаратә еилакы ацхыраарала. Ахәыҷқәа ҳгәазыҳәарақәа зегьы нарыгӡеит. Рҭаацәагьы ҳаргьы ҳдыргәырӷьеит", — иҳәоит Адлеиба.
Косики карате Аԥснытәи Афедерациа ахада иажәақәа рыла Ростовтәи атурнир зыҟаҵара бзиахеит Москва, абҵара 2-6 рзы имҩаԥысраны иҟоу ачемпионат азы.
