АҞӘА, абҵара 2 —Sputnik, Сариа Кәарацхьелиаԥҳа. Москва иҟоу аԥсуа диаспора ацхантәаҩы Валери Кобахьиеи иԥшәма ԥҳәыс Симонеи ачара ашьҭахь агәыҳалалратә еиҿкаара "Кьараз" иарҭеит 100 нызқь мааҭ аԥара, абри атәы Sputnik акорреспондент илзеиҭаиҳәеит Валери Кобахьиа.
"Аибашьра ашьҭахь ауааԥсыра рҭагылазаашьа уадаҩхеит, ацхыраареи адгылареи зҭаху рацәаҩхеит. Уи арҽеира иашьҭоу афонд аԥара аҭара иахҭоу усны исыԥхьаӡеит. Ҳхазы маҭәак ааҳамхәаргьы, џьара ԥсшьара ҳамцаргьы, уи усҟак ихадам, ацхыраара иашьҭоу егьырҭ ауаа рҿаԥхьа иқәгылоу ауадаҩрақәа иаҿурԥшуазар", — ахыиҳәааит иҟаиҵаз аус аҭаацәара аԥызҵаз.
Абҵара 1 Валери Кобахьиа абанк ала "Кьараз" иахыиԥхьаӡалеит аԥара.
"Ари зегьы ирбо ираҳауа изыҟасҵаз, асҿыԥшырцаз ауп. Уазхәыцыр, аума ҟасымҵеит, ас еиԥш еиҭа изылшаз иоуп аҳаҭыр зықәҵатәу, уи ихымҩаԥгашьа анаҩс ақьиара иаҿырԥшыгахоит. Шаҟа акум аус злоу, амаҷ акәзаргьы иҟаҵа", — иазгәаиҭоит Кобахьиа.
"Кьараз" аиҳабы Камма Гоԥиаԥҳа лажәақәа рыла, Валери Кобахьеи Симонеи иҟарҵаз иақәгәыӷуамызт.
"Иацы Валери Кобахьиа иҽсымаидеит, ҳаиԥылан ҳаицәажәарц дсыҳәеит. Ҳаиԥылараан иҳәеит рҭаацәа ачараҿы иаанаг 100 нызқь мааҭ "Кьараз" иарҭарц шырҭаху", — еиҭалҳәеит лара.
Ҿыц еиднагалаз аханатә аԥара агәаҳалалрахь ишырышьҭуеит ҳәа азырмыӡбацызт, аха афонд аиҳабыи дареи реицәажәара ашьҭахь еилкаахеит, "Кьараз" Лашкьындар ақыҭан ахәыҷырацәа змоу аҭаацәа рзы аҩны шдыргылоу.
"Камма Гоԥиаԥҳа еиҭалҳәеит афонд аусура атәы, ирԥыло ауадаҩрақәа дырзааҭгылеит. Ҳара иҳаӡбеит зыҩны бгаз аҭаацәара аҿыц ахь ииасырцаз, зыргылара иалагахьоу, аха аԥара ззымхо, ҳрыцхраарц", — иҳәеит Кобахьиа.
Аҩны аргылара иаҿуп "Амра банки" азауад "Аԥсны аҩқәеи аӡқәеи" иҟарҵаз ацхыраарала. Урҭ ирыцлеит Кобахьиаа рҭаацәарагьы.
Валери Кобахьиа иԥшәма ԥҳәыси иареи агәыӷра рымоуп егьырҭ ачара зураны иҟоу аҭаацәарақәагьы дара рҿыԥштәы иацныҟәап ҳәа.
