АҞӘА, абҵара 20— Sputnik, Бадри Есиава. Афильм "Алибек" рызкуп Нхыҵ Уаԥстәылатәи аҽыбӷаҟазацәа рабиԥара ҳәа радио Sputnik Аԥсны иазеиҭеиҳәеит арежиссер Вадим Цаликов.
"Нхыҵ Уаԥстәыла еицырдыруаз Кантемиров Алибек Тузар-иԥа 110-шықәса раԥхьа ацирк аманеж ахь дцәырҵит ҽыбӷаҟазаҩык иаҳасаб ала. Иуҳәар ауеит иара иоуп СССР ацирктә ҽыбӷаҟазара шьаҭазыркыз ҳәа. Аамҭақәак рышьҭахь иаԥиҵеит аҽыбӷаҟазаҩцәа ргәыԥ. Атруппа "Джигиты Али-Бек" аԥхьа иалахәын иара иашьцәа, нас, иԥацәа рыхҩыкгьы иус иацырҵеит", — ҳәа еиҭеиҳәоит Цаликов.
Арежиссер Вадим Цаликов еиҭеиҳәеит 25 шықәса инарзынаԥшуа адокументалтә фильмқәа рҭыхра дшаҿу. Урҭ ируакуп Беслан ақалақь аҿы 2004 шықәса рзы иҟалаз ахҭыс иазку афильмгьы.
Иара иҳәеит "Граждане Беслана" захьӡу афильм ашьҭахь ари атема азыхынҳәра шиҭахымыз.
"Даара иуадаҩын, аха абри атрагедиа зхызгаз ауаа санрыҿцәажәа ашьҭахь еилыскааит урҭ рыӡбахәгьы саламцәажәар шамуаз. 2006 шықәса рзы иҭысхит афильм "Отставной учитель", Зоурбек Хутиев изкыз. Иара урҭ амшқәа рзы шасыс иргаз дреиуан. 2008 шықәса рзы иҭысхит афильм "Беслан-надежда", 2014 шықәса рзы – "Беслан-память"", — ҳәа еиҭеиҳәоит Цаликов.
Цаликов аԥхарра ду аҵаны игәалаиршәоит ихәыҷраамҭақәа раан Аҟәа иҟазаара. Усҟан, иахьа зыдунеи зыԥсаххьоу иаб дицны ара дыҟан.
"Сҭаацәа рыдунеи рыԥсаххьеит, аха ақалақь рацәак ҽеиҭакрак амам. Схәыҷраамҭақәа сырзыхынҳәызшәа збоит", — иҳәоит Вадим Цаликов.
XI Жәларбжьаратәи иаарту Нхыҵ Кавказтәи акинои ателехәаԥшреи рфестиваль мҩаԥысуеит Аҟәа, абҵара 15-20 рзы.
