АҞӘА, абҵара 28 — Sputnik. Шәҩыла, зықьҩыла ауаа Дмитри Хворостовски наунагӡа абзиараз ҳәа иарҳәон абҵара 27 рзы, Москва, Чаиковски ихьӡ зху аконцерттә зал аҟны. Абри атәы аанацҳаит РИА Новости.
Уаанӡа Дмитри Хворостовски иԥсҭазараҿ аҵыхәтәантәи игәазыҳәарала иԥсыбаҩ акремациа азуны ҩ-қалақьк: Москвеи Красноиарски рҟны анышә иамадахароуп ҳәа аҳәамҭа ҟаиҵахьан СССР жәлар рартист Иосиф Кабзон.
Хворостовски иԥсҭазаара далҵит абҵара 22 рзы, Лондон, 56-шықәса дшырҭагылаз.
1989 шықәса рзы Би-би-си ателехәаԥшратә конкурс, Кардифф (Великобританиа) ақалақь аҟны имҩаԥысуаз, "Адунеи ашәаҳәаҩ" аҿы "Иреиӷьу абжьы" ҳәа иигаз аиааира ашьҭахь адунеи аҿы деицырдыруа дҟалеит. Ниццатәи (Франциа) Nice Opera аҟны Петр Чаиковски иопера "Пиковая Дама" аҟны иқәгылара ашьҭахь Дмитри Хворостовски днарыԥхьо иалагеит адунеи иреиӷьу атеатрқәа, афестивальқәа рахь.
