АҞӘА, абҵара 29 – Sputnik. Аҵыхәтәантәи ахышықәса рыҩныҵҟа Аԥсны иҟоу Урыстәыла Аладатәи арратә округ аррамаҵзурауаа 100 инарзынаԥшуа аибашьыгатә машьына ҿыцқәа роуит. Абри атәы Sputnik иазеиҭеиҳәеит Аԥсны иҟоу Урыстәыла Аладатәи арратә округ апресс-маҵзура аиҳабы Вадим Астафьев.
Иара иажәақәа рыла иахьазы арратә техника ҿыцрыла еиқәыршәоуп 80 процент рҟынӡа.
"Аҿыц техника, ПРП-4 "Нард" БТР-80 реиԥш иҟоу иажәыз аԥсахит. Аррамаҵзурауаа рҽазыҟаҵарақәа раан ахархәара рырҭоит иҿыцны ирзааз атехника. Урҭ рҿаԥхьа иқәгылоу адҵақәа рынагӡараан уи хра аманы иҟоуп", — иҳәеит Астафьев.
Иара иазгәеиҭеит атехника ҿыц ахь ишаҵанакуа атанкқәа Т-72Б3, акәылӡтәытранспартиорқәа БТР-82АМ, еиҭаҵуа аԥшыхәратә пунктқәа ПРП-4А "Аргус", "Тигр" иақәыргылоу арадиоелектронтә ҿагыларазы автоматизациа зызуу акомплексқәа "Леер-2".
Арратә техникеи атехника ҷыдеи арахь иаагоуп иахьыҭрыжьуа азауадқәа рҟынтәи еихамҩалеиԥш рхаланыҟәаралагьы.
