АҞӘА, ԥхынҷкәын 13 – Sputnik. Аиҭашьақәыргыларатә усурақәа раан ВДНХ апавилион хадаҿы амцакра ҟалеит, убри аан аԥсуа павилион ԥырхага амоуит ҳәа Sputnik иазааицҳаит Урыстәыла иҟоу Аԥсны Ахәаахәҭратә хаҭарнак Олег Барцыц.
"Аинформациа даара имаҷуп. Амца ахы цәырнагеит апавилион иакәыршаны игылаз амҿтәы халарҭақәа рҟны. Аԥснытәи апавилион ааигәара амца мнеиӡеит", — иҳәеит иара.
Барцыц иажәақәа рыла аԥсуа павилион аҿы аиҭашьақәыргыларатә усурақәа ирыцҵоуп.
"Аремонттә усурақәа ирҿуп. Атәыла Ахада инапынҵала Жәларбжьаратәи аусутә культуратә центр иҟоу ахылаԥшра анаҭоит, имҩаԥнагоит аргыларатә материалқәа рхаҭабзиара агәаҭареи аусурақәа рымҩаԥысшьеи", — иҳәеит иара.
Олег Барцыц ишиҳәаз ала аусурақәа хыркәшахоит 2018 шықәса рзы.
Амцакра ҟалеит ԥхынҷкәын 12, асааҭ 23.00 рзы. 100 метра ԥшьыркца рҟынӡа аҵанакит. Амца иаарласны ирцәан. Ԥсыҭбара ҟамлеит.
