АҞӘА, ԥхынҷкәын 15 – Sputnik, Бадраҟ Аҩӡба. Есышықәса имҩаԥысуа акциа "Ишәхамшҭларц азы" мҩаԥысит Аҟәа, Ахьӡ-аԥша апарк аҿы. Акциа еиҿыркааит Владислав Арӡынба ихьӡ зху Ахьӡ-аԥша амузеии Аҟәа ақалақь Ахадара аҿари аспорти рзы Аилаки.
"Ԥхынҷкәын 14 ҳаамҭазтәи Аԥсны аҭоурых аҟны реиҳа илахьеиқәҵагоу рыцхәуп. Ҳаар ари акциа мҩаԥаагоит аҿар ирхамшҭразы, иргәалашәаразы иҟаз арыцҳара. Лаҭатәи ажәҩан иаҵанҵәеит иихьази аира изахьымӡази ахәыҷқәа. Аҳәарагьы цәгьоуп, агәаларшәарагьы уадаҩуп. Асеиԥш иҟоу агәы ахәра ахаангьы ӷьашьа аиураны иҟам", — лҳәеит Владислав Арӡынба ихьӡ зху Ахьӡ-аԥша амузеи адиректор Мзиа Беиа.
Лаҭатәи арыцҳара иалыԥсааз ргәаладыршәарц арахь иааиит шәҩыла ауаа, иҭахаз рыцыԥхьаӡа иаркын агәалашәаратә цәашьқәа.
1992 шықәса, ԥхынҷкәын 14 рзы ақырҭуа фашистцәа Лаҭа ақыҭан иҭадырхеит урыстәылатәи арратә мчрақәа иртәыз, агуманитартә реис мҩаԥызгоз аверталиот Ми-8. Иҭахеит 85-ҩык, урҭ рҟынтәи 35-ҩык ахәыҷқәеи 8-ҩык зцәа зтәымыз аҳәсақәеи.
