АҞӘА, ԥхынҷкәын 18 – Sputnik, Бадраҟ Аҩӡба. Аԥсуа спортсменцәа ҿарацәа тхеквондо азы Шәача иааныркылеит аԥхьахәтә ҭыԥқәа, абри атәы Sputnik акорреспондент изеиҭаиҳәеит Аԥсны тхеквондо азы Афедерациа ахада Оҭар Гәогәуа.
"Ари есышықәса имҩаԥысуа еицлаброуп, еиҿкаауп ҩаӡара ҳаракыла. Аԥхьахә агаразы иқәгыло аиҳарак аспорстменцәа ҿарацәа роуп, аиааира аанаҳкыларцаз акыр ҳҽазыҟаҳҵон,", — нациҵеит иара.
Актәи аҭыԥ аанылкылеит Зарина Кумаритова, аҩбатәи аҭыԥқәа – Роман Меликлиани Никита Кохани, ахԥатәи – Вероника Чакриан, Арсении Цвых, Енвер Отырба, Алиса Барановскаиа.
"Ҳара хҽазаҳшәоит ахәыҷкәа Аԥсны анҭыҵ имҩаԥысуа аицлабрақәа рхы рыладырхәырц. Алыҵшәақәа аныҟалак, дара еиҳагьы рҽадцаланы рҽазыҟарҵоит", — инаҵишьит Гәогәуа.
Аицлабра иалахәын 200 ҩык инарзынаԥшуа 6 шықәса инаркны 10 нӡа зхыҵуа ахәыҷкәа. Аԥснынтә аԥхьахә агаразы Шәачаҟа ицеит 18 ҩык аспортсменцәа. Аицлабра иалахәын иара убас Краснодар, Курганинск, Туаԥсе, Армавир, Новороссииск, Шәача уҳәа рҟнытә ахәыҷкәа.
