АҞӘА, ԥхынҷкәын 21— Sputnik, Бадраҟ Аҩӡба. Приморск ақыҭан арратә ҵәахырҭақәа рҿы иҟалаз аԥжәара зыхҟьаз макьанагьы аҭҵаара иаҿуп иҳәеит Аԥсны Ахада Рауль Ҳаџьымба ипресс-конференциаҟны.
"Апрокуратура аекспертизақәа рымҩаԥгара иаҿуп. Урҭ рылкаақәа ишьақәдыргылоит иҟалаз зыхҟьаз",- иҳәеит иара.
Ҳаџьымба иажәақәа рыла аекспертиза мҩаԥыргоит Урыстәылатәи Афедерациаҟны.
Атәыла Ахада далацәажәеит аԥхасҭа зауз атуристцәа 6 миллион мааҭ рҟынӡа аԥара шрызшәоу.
"Макьаназы 130-ҩны рҟынӡа рхыбқәеи рԥенџьырқәеи ԥсахуп. Акыр ахарџь аҭахны иҟоуп", — иҳәеит атәыла Ахада.
2014 шықәса абҵарамзазы, Ашықәс ҿыц аламҭалази атәыла Ахадас иҟазаара 100-мш ахыҵреи инарыдҳәаланы Аԥсны Ахада Рауль Ҳаџьымба имҩаԥигеит раԥхьатәи апресс-конференциа ду. 2016 шықәса ԥхынҷкәын 27 рзы Рауль Ҳаџьымба имҩаԥигеит аҩбатәи апресс-конференциа ду.
