АҞӘА, ԥхынҷкәын 21— Sputnik, Бадраҟ Аҩӡба. Аҳәынҭқарратә биуџьет ахатәы лшамҭақәа рыла ихаҭәаауеит иҳәеит Аԥсны Ахада Рауль Ҳаџьымба ипресс-конференциаҟны.
"Аҵыхәтәантәи ашықәсқәа рҭагылазаашьа уахәаԥшуазар, иумбарц залшом азеиԥш хыԥхьаӡара шеиҵахаз. 11-13 миллиард мааҭ инаӡон уаанӡа, аха иара убри аан урҭ аԥарақәа Урыстәылатәи Афедерациаҟынтәи иаашьҭыз ракәын реиҳарак", — иҳәеит иара.
Ҳаџьымба иҳәеит иахьазы Урыстәылатәи ацхыраара хә-миллиард рҟынӡа ишынаӡо, уи уаанӡатәи ашықәсқәа раасҭа акыр ишеиҵо.
"Иахьа ақыҭанхамҩа аҿиара иаҿуп, хра аманы иҟоуп атуризм аусхк" — ҳәа азгәеиҭоит атәыла Ахада.
2014 шықәса абҵарамзазы, Ашықәс ҿыц аламҭалази атәыла Ахадас иҟазаара 100-мш ахыҵреи инарыдҳәаланы Аԥсны Ахада Рауль Ҳаџьымба имҩаԥигеит раԥхьатәи апресс-конференциа ду. 2016 шықәса ԥхынҷкәын 27 рзы Рауль Ҳаџьымба имҩаԥигеит аҩбатәи апресс-конференциа ду.
