АҞӘА, ԥхынҷкәын 22— Sputnik, Бадраҟ Аҩӡба. Аԥсны Ахада Рауль Ҳаџьымба имҩаԥигаз апресс-конференциаҟны иҳәеит арҭ ахышықәса рыла еиҳа аҽынкылара иманы дшыҟалаз.
"Сара сзы изныкымкәа ирҳәахьан саппонентцәа рганахь ала ахынкылара маҷны иаасырԥшуеит ҳәа. Иҟалап иара усҵәҟьа сыҟазаргьы, избанзар зынӡак имариаӡам еиуеиԥшым аҭагылазаашьақәа раан аҽыҟажара", — иҳәеит Рауль Ҳаџьымба.
Атәыла Ахада иазгәеиҭеит ауаа еилибакаалар шакәу, аӡәы ииҳәо егьи иаҳалар шакәу.
"Сгәыӷуеит аҵыхәтәантәи аамҭақәа рзы аҭышәынтәалара сара сымацара исыбзурам, уи аоппозициаагьы ирыбзоуроуп ҳәа. Ҳара еицаҳҵеит аизыӡырыҩрра, аицәажәашьа, аимак-аиҿак амҩаԥгашьа. Аиҳаракгьы абарҭ зегьы ауаа ирыламҵакәа, ҭынчла, акабинетқәа рҿы рымҩаԥгара", — иҳәеит иара.
2014 шықәса абҵарамзазы, Ашықәс ҿыц аламҭалази атәыла Ахадас иҟазаара 100-мш ахыҵреи инарыдҳәаланы Аԥсны Ахада Рауль Ҳаџьымба имҩаԥигеит раԥхьатәи апресс-конференциа ду. 2016 шықәса ԥхынҷкәын 27 рзы Рауль Ҳаџьымба имҩаԥигеит аҩбатәи апресс-конференциа ду.
