АҞӘА, ԥхынҷкәын 26 – Sputnik, Бадраҟ Аҩӡба. Ахеилак аизара ду иалахәын Аԥсны ахаҭарнакцәагьы ҳәа радио Sputnik иазеиҭеиҳәеит ашәҟәыҩҩы Владимир Делба.
"Аизара ду аҟны ирылацәажәан арегионалтә журналқәа рҭыжьра азҵаара, иазыԥхьагәаҭоуп урҭ х-бызшәак рыла рҭыжьра. Ҳара ҳганахь ала иазыӡбоуп аԥсуа бызшәа аҟынтәи аурысшәахьи аԥсуа бызшәаҟынтәи англыз бызшәахь аиҭагара", — иҳәеит иара.
Иара убасгьы ирыдкылан аӡбра алитературатә фестиваль лаҵарамзазы имҩаԥгазарц. Ахԥатәи Евразиатәи алитературатә фестиваль ахь инаԥхьоуп 45 тәыла рҟынтәи алитераторцәа. Аԥсны абри апроект иалахәуп иара анышьаҭадырк, 2015 шықәса раахыс.
"Арҭ азҵаарақәа Ассамблеиа анапхгара аҳәаақәа ирҭагӡаны ирыхәаԥшраны иҟоуп. Аԥаразоужьра ҟалар арҭ азҵаарақәа ӡбахоит", — иҳәеит Делба.
Апроект аҳәаақәа ирҭагӡаны ажурнал урыстәылатәи арегионқәа рҟны аҭыҵра иалагахьеит.
"Ажурнал аҿыгҳара 200 даҟьа рҟынӡа инаӡоит", — иҳәеит Делба.
Евразиатәи ажәларқәа Рассамблеиа ашәҟәыҩҩцәеи аԥхьаҩцәеи Рхеилак актәи аизара ду иалахәын Германиа, Франциа, Бельгиа, Даниа рхаҭарнакцәа.
"Иара убасгьы иалахәын Венгриа, Болгариа, ИАР атәылақәа рхаҭарнакцәа. Зынӡа иааизакны 45 тәыла рхаҭарнакцәа", — иҳәеит Делба.
