АҞӘА, ажьырныҳәа 24– Sputnik, Бадраҟ Аҩӡба. Аԥснытәи абоксиор Армен Чалукиан аиааира игеит абокс азы Аладатәи Афедералтә округ аиндаҭлараҿы. Абри атәы Sputnik иазааицҳаит абокс азы Аԥсны Афедерациа апрезидент Альберт Карди оглы.
Абокс азы Аладатәи Афедералтә округ аиндаҭлара мҩаԥысуан 17-18 шықәса зхыҵуаз аҿар рыбжьара.
"Абри аиндаҭлара аԥхьа имҩаԥысит Краснодартәи атәылаҿацә аиндаҭлара. Уа Армен Чалукиан актәи аҭыԥ ааникылеит. Ԥшьынтә дықәгылеит. Рыԥшьынтәгьы диааиит", — иҳәеит Карди оглы.
Атурнир аҟны ииааира Армен Чалукиан инаҭоит алшара абокс азы Урыстәыла ачемпионат далахәхаразы.
"Армен шықәсык иназынаԥшуа Краснодар иҽазыҟаиҵоит. Иара изныкымкәа Аԥсны аиааирақәа игахьан. Аҷкәын аџьа бзиа избо уаҩуп, дыспортсмен шьахәхоит ҳәа агәаанагара ҳамоуп", — иҳәеит Алик Карди оглы.
Абокс азы Аладатәи Афедералтә округ аиндаҭлара иалахәын 130-ҩык рҟынӡа аспортсменцәа қәыԥшцәа. Имҩаԥысуан Ростовтәи аобласт ақалақь Сальск аҟны.
