АҞӘА, ажьырныҳәа 24 – Sputnik, Бадраҟ Аҩӡба. "Русское общество Абхазии" асаит аусура иалагеит иҳәеит Sputnik Аԥсны аинтервиу азҭаз аиҿкаара анапхгаҩы Роман Риазанцев.
"Ҳгәыӷуеит асаит ахархәарала ҳусуразы аинформациа зҭаху ироулоит ҳәа. Асаит аҟны иубар алшоит аиҿкаара аԥҟаԥҵәатә, аҭаҩратә документқәа, аҳасабеилыргаратәи аревизиатәи ҳасабырбақәа", — иҳәеит иара.
Уи адагьы асаит аҭааҩцәа ирбар алшоит аҟәша "Аџьынџьуаа" (Соотечественники- аред.) иҳәеит Риазанцев.
Риазанцев иазгәеиҭеит асаит аартра Аԥсны инхо аурысқәа рызҵаарақәа аҭак рыҭареи рыпроблемақәа рыӡбреи ирыцхраашт ҳәа. Уи адагьы асаит аҟны иҟоуп "Русское общество Абхазии" ахалархәразы абланк аформа.
"Асаит аҭааҩцәеи ҳареи наҟ-ааҟ ҳаинырра азыԥхьагәаҭоуп. Ҳара иҳагәҭакуп уи ауаажәларратә дкыларҭа аформа аҭаны аиҿкаара", — иҳәеит иара.
Роман Риазанцев иажәақәа рыла ауаа аиҿкаара иаҭаауеит еиуеиԥшым азҵаарақәа рыманы.
